Гьарица шинал жула билаятрай лахъа-хъунну кIицI лагай Строительтурал кьини. Гьашину ва байран дагьлай дур август зурул 14-ннийн.

Пишалул кьини барча дуллай ура цинявппагу ва аралуву зузисса инсантурахь. Зул хъунма­сса захIмарайну цIу-цIусса къатравун бизлай буссар цикссагу кулпатру, цIу-цIусса школарттайн, садикирттайн занай бу­ссар жула оьрчIру. ЧIа тIий ура зун цIакьсса цIуллушиву, давриву тIайлабацIуртту, кулпатирттаву барачат.
Аьрасатнаву Дагъусттан мудангу ккаллину бивкIссар хъунисса строительстварду дуллалисса майдандалун. Му даврил чулуха Аьрасатнаву Дагъусттаннал бугьлай буссар шамилчинсса кIану.

2008-2018 шиннардий Дагъусттаннай чялишну най дуссия строительствалул давуртту. Махъсса шиннардий тIурчан, бущи цахъи хIурхIа хьунни. Мунинсса ца сававну хъанай дур документругу дузал къабувнува, ихтияр дакъанура, объектирдайн дуцинсса коммуникациялул гужгу хIисавравун къалавсунма, ччи-ччикун къатри дуваву. Му бакъассагу, объектру дуллай бур, хIаятраву оьрчIан бигьалагансса площадкартту, машинартту бацIан бансса кIанттурду къабивтунма.
МуницIунма бавхIуну щавщи биллай бур документациялул шилтагъшиву дакъасса, цала даву дакIнийхтуну дуллалисса идарарттал даврийнгу. Шагьрулул хъуниминнал, цIусса строительствалул объектру дуллансса ихтиярду дулаву дацIан дурну, строительстварду чан хьуну, къатрахсса багьригу гьаз хьуна. ХIасил, строительствалул давуртту лиян дан ва дацIан дан хъинну бигьассар, аммарив му даву сакин дурну, нирхиравун рутанни захIматсса.

Махъсса ппурттуву тIурчан, хIалли-хIаллих тIий ххуй чулиннайсса дахханашивуртту хъанай дарчунни. Багьрая тIурчаннив, 2018 -2020 шиннащал цачIу бивхьуну, къатрал 1 квадратный метралул багьа 10-12 азарда къурушрал лахъ хьуну бур. МахIачкъалалив цIана 1 кв.метра къатрал дур 30-45 азаруннин дацIлай.
Цамургу кIицI лаган ччисса зат бур, шагьрулул каялувчитурал, строительствалул министерствалул вакилтурал къатри машан ласласиминнай тахсир ляхълай бушиву, миннан ихтиярду, документирттал хIалкьазия къакIулшиврийн бувну. Жулва чIявуми пайщиктал бур учительтал, хIакинтал, агрономтал, ризкьичитал, хIасил, цалла кIапIикI цачIун дурну, къатри машан ласун бувкIсса инсантал. Аммарив жавабрайн буцлай бакъар хасъсса экспертътурал бувсса экспертизартту бакъанма, къатри дан ихтияр дуллусса къуллугъчитал, специалистътал. Цумур духьурчангу строительство хIукуматрал къуллугърал вакилтурал ихтияр дакъа дайдишин къабюхъайссар.

«Твой дом» тIисса нава хъунама инженерну зузисса строительный компаниялул 2020-ку шинал ахирданий «Новый город» тIисса цIусса микрорайондалий бувну къуртал бувссар 12 зивулий­сса 76 квартира бусса къатта. Масалдаран, утти цIусса микрорайондалий строительство дансса ихтияр дуллалиссаксса хIаллай жуща бюхъанссия кIива цIусса къатта бувну къуртал бан. Вай гьантрай, булун най бур жу­хьхьун къатри дансса аьрщи итадакьинсса ва къатри дуллан ихтияр дусса хIукму. Ттула макьалалуву инсантуран бувчIин бан ччай ура ссайн бувну гьаз хъанай бу­ссарив къатрахсса багьри. Цукун бухьурчангу, оьрмул оьрмулухун строительствалул даву мудангу тIалавшинна дусса ва ххишала дакъа аькркинсса дур.
«Аьрщи ляхъан дурма ур хъу­насса Зал, гихуннайсса чIя­русса давуртту тIурчан строительтурал хIарачатрайну дур­сса дур» тIисса, аькьилсса калима нахIакьдансса дакъар. Къатри жура дуллантIиссару ва дуллайнма бикIантIиссару.

Сайдун ХIажикьурбанов, ДР-лул лайкь хьусса
строитель