Турист объектру мюхчан даву мурадрай

Туристътал заназисса, миннал дянив тIалавсса Дагъусттаннал районнайсса объектру къулай ва мюхчан даврин 60 млн арцул итабакьинтIий бушиву бувсунни Региондалул туризмалул ва халкьуннал художествалул касмурдал министрнал хъиривчу Анна Безруковал.

– Турист объектру хьхьи­чIуннай даву ва туристътурал мюхчаншиву дуруччаву мурад­рай, Туризмалул министерствалул итадаркьуссар муниципалитетирттансса арцу. Цинявннан бавсса куццуй, Хъунзахъиял жюружанттуйх ялавайсса кьакьалувун машина багьссар тикку дикIан аьркинсса мюхчаншиву дакъашиврийн бувну. Уттиния тинмай укунсса иширттая бурувччуну бикIаншиврул Туризмалул министерствалун итабакьлай бур 60 млн арцул, – увкунни Анна Безруковал.

Ванил мукунма бувсунни муниципалитетирттан арцу дуллай байбивхьушиву ва ми давуртту анаварсса мутталий шинал лажиндарай дурну къуртал дан аьркиншиву.
– Цакуну цинярда турист объектирдайсса тагьарду хIи­савравун ласун захIматну бур. Му чулуха жун хъунмасса кумаг буллай бур республикалул МЧС-рал ва МВД-лул. ЦIана Туризмалул министерствалул дайдирхьуну дуссар вай объектирдай хъанахъимур чIалачIи бансса камерартту бихьлахьисса пилот проект. Объектирдайсса видеокамерарттая тIайланнасса трансляцияртту дукIлантIиссар МЧС-райн ва МВД-лийн, мукунна Туризмалул министерствалийнгу, – увкунни ванал ялагу.