Вай гьантрай ГьунчIукьатIув кIицI ларгунни Шяраваллил кьини. ВаницIун дархIусса мероприятиярттал лагрулий шяравусса музейраву шадлугърал даражалий тIивтIунни аьпалухьхьун лавгсса шаэр, педагог Даниял Магьдиевлун хас бувсса мурцIу. КIицI лаган, Даниял Магьдиев ГьунчIукьатIрал шяраваллил хIурматлувсса гражданингу хъанахъиссия.
Музейрал чIирайн лархъунни Данияллул сурат, ккаккиялун бивхьунни ванал луттирду. Му бакъассагу, ва кьининин итабавкьусса «ГьунчIукьатIрал назмурду» тIисса луттиравугу дур Данияллун хас дурсса, ванал шеърирду бусса лажин.
Мероприятиялий гьурттушинна дан бувкIун бия Данияллул арс Роберт, оьрчIал оьрчIру. Цала ххаллилсса дус дакIнийн утлатисса ихтилат бунни «Унчукатль» ДРОО-лул председательХIажибутта ХIусайновлул.
Робертлулгу дакIнийхтунусса барчаллагь увкунни цала буттал цIа бусраврай ядуллалисса, ва даврил сиптачи ва сакиншинначи хьусса ХIажибуттахь, музейрал зузалтрахь, щалагу ГьунчIукьатIрал жяматрахь. Ванал бахшиш бунни музейран личIи- личIисса шиннардий бувксса буттал назмурдал жужру.
