Уттара дурккун дия ГьунчIукьатIрал щар

Уттара дурккун дия ГьунчIукьатIрал щар

Вай гьантрай ГьунчIукьатIув лахъа-хъунну кIицI ларгунни Шяраваллил кьини. Ва кьини уттара дурккун дия щалла щар, шяраваллил ккурчIа-чIира бувцIуну бия инсантурал. Байрандалийн архсса шагьрурдая бувкIун бия, щарнил жямат бакъассагу, райондалул щархъаясса, архсса шагьрурдаясса бусравсса хъамал. ГьунчIукьатIи цIа дурксса шяравалу душиву ва ххуллухгу исват хъанай бия. Шяравун укъавкIссавагу акъая.

Шадлугъ дайдишин хьхьичI щарнил хIатталлий дуруна мавлуд. Хъирив, цIанихсса аьлимчу Амир Амаевлул буттал къатрай лархъунни аьпа абад буллалисса мармарчарил ула.
Мажлис тIивтIуна шяраваллил администрациялул бакIчи МухIад Штанчаевлул. Дурсса даврил хIасиллая ва гихуннай дан пикрилийсса давурттая ихтилат бувна жяматрахь «Унчукатль» ДРОО-лул председатель ХIажибутта ХIусайновлул.

Шяраваллил кьини лахъа-хъун дан бувкIун бия Лакрал райондалул бакIчинал хъиривчу Абубакар Къюннуев ва администрациялул иширтталсса буллалисса ХIажи Чавтараев.
Абубакар Къюннуевлул ихтилатраву кIицI лавгуна, шяраву лявхъусса, хъуни хьусса инсантуран ва хъуннасса агьамшиву ду­сса байран хъанахъишиву. Ялун нанисса никирал оьрчIругу буржлувну бикIан аьркиншиву буттал шяравалу цIу лаган даву мурадрайсса давуртту дуллан.

– Шяраваллил жямат пахрулий бикIан аьркинссар дунияллийх машгьур хьусса, лакрал миллатрал цIа-кьини бюхттул дурсса аьлимтал шичча бувккуну тIий. Ттун личIинува кIицI лаган ччай бур, райондалул социал-экономикалул даража хьхьичIунмай бавриву, жагьилсса ник патриот зумуну тарбия давриву хъунмасса бутIа бивхьусса ххаллилсса шяравучу ХIажибутта ХIусайнов. Райондалул бакIчи Юсуп МахIаммадовлул цIания «Почетный гражданин Лакского района» тIисса бусравсса титул тапшур дуллай буру ва хIакьинусса кьинилул мажлисрай, – увкунни Къюннуевлул ва бавхIунни ХIажибуттал хъачIунттайх му цIаницIунсса лента.

Жагьилтал спортрахун бутавриву ва жяматрал иширттавух хIала буххан бавриву бувсса хIарачатрахлу райондалул администрациялул чулухасса хIурматрал грамотартту дуллунни Юсуп ТIагьировлун ва Билал Рамазановлун.

«Унчукатль» ДРОО-лул чулуха ХIажибутта ХIусайновлул баян бунни гьашину «Человек года» тIисса цIанин Зиябуттин ХIажимирзаев лайкь хьушиву , «Спонсор года» тIисса цIа хIалал дуршиву ишбажаранчи Сиражуттин Къардашовлул. Жяматрал иширттавух чялишну гьуртту шайсса унутIий барчаллагьру баян бунни Марис Илиясовлун ва Арсен Штанчаевлун.
Хъирив презентация дунни «ГьунчIукьатIрал назмурду» ва «Унчукатлинцы – труженики тыла» тIисса луттирдал.

Барча бавуртту ва презентация къуртал хьуну махъ, шяравусса музейраву шадлугърай тIивтIунни хъунасса аьлимчу Амир Амаевлун хас бувсса мурцIу.
Авадансса дия ва кьинисса программа. Хьунни шикку уссурвал Руслан, Кьурбан ва Камил АхIмадовхъал цIанийсса шахматрал турниргу.
Байрандалул кьини хьунни «Годекан 2.0» тIисса воркшопгу. Шикку, личIи-личIисса шагьрурдая бувкIун, Дарбант шагьру хьхьичIунмай баврил проект­раха зий бивкIсса, опыт бу­сса пишакартал хьунабавкьунни ГьунчIукьатIрал жяматращал, вайннал шяравалу хьхьичIуннай даврил хIакъиравусса масъалар­тту ххал бивгьунни.
Воркшопрай хьусса ихтилатирттая гьарта-гьарзану бусанну кказитрал хъиривмур номерданий.

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: