Ттигъанну лавгру Ухссавнил АьсатIиннавун, жула язисса арснал Аликлул кIилчинмур ватандалийн. Ччя-ччяни аьрххи багьайссия ттун Ухссавнил АьсатIиннал хъуншагьрулийн, Владикавказрайн, Лакрал театрданущал гастроллайн ягу фестиваллайн. Ххарисса асардащал лагу-лавгун, занагу шайссияв.

Уттирив т1урча най бура къювулул хханхха ххябуклай, лякьлуй бярччу багьсса ттула ссийщал СахIивлущал ва яхI гъавгъсса куявнащал Багьауттиннущал. Лахъишиву ва базилух ххуллулгу.
ЛухIи ларххун бур аьсатIиннал кьуватсса зунттурду, рухI дакъа бур Владикавказуллал аьнтIикIа кIичIиртту – увар ттигу хьунаакьин бакI-чурххал бювхъусса аланнал чиваркIуннавасса цаягу, чIава жагьилтал ва дяоьрмулува бувксса личIаннин. Оьр­мулул чагъиравуми цинявппа Украиннал аьрщарайсса хасъсса аьрали операциялийри тIар. Талатаврил цIадурксса Владикавказрай цавагу бакъасса бур аьраличу акъасса кулпат. Шичча арх бакъа буссар аьрали шагьру Спутник, шиккугу дуссар Аьрасатнал аьралуннал зувираксса часть. 43057–мур аьрали частьрал 429-мур мотострелковый полкраву 2016 шиная шийнай къуллугъ буллай уссия жул Аликгу, кIилчинмур мотострелковый батальондалул цалчинмур минометрал взводрал хъунама наводчикну. Бусалардавун багьсса Владикавказуллал пехоталул ца яла язима талаталан ккаллину уссия. Аьралуннал хъуниминнал итталу, аьрали гьалмахтуран бусравну уссия. Дустурал нитти-буттан, уссур-ссуннал ххирану уссия.
Най бура аьрали шагьрулувух, Аликлул ччан бивзсса аьрщи мукьал дяххан дуллай. Шикку бувгьусса тIутIал къатIрава ниттин ссайгъатрангу бувкIуна аьрайн гьан гьантлул хьхьичI. Ххюйннива шанма бакъа утта къабувккунни. Аликлул лякьлуя къабивзсса оьрчIан кIанттай цивура рухI-ссихI дуссаксса аякьалий бикIанна тIар.
Катюшалухун ша бишлай най бур интту аьралуннаву къуллугъ буллан бувкIсса чIава аьралитал. Буруглай бура гьарцаннал иттав, Аликгу уссар шивах учиннин щилчIав.
Вана шикку ХIурматрал улттуй. КIира шинал хьхьичI дунияллул халкьуннал дянивсса аьрали учениярттай Аьрасатнал обороналул министрнал бивщусса бюхттулсса кьиматрахлу лахъан увну. Цува Шойгу уссия, тIий буслай ур Денис Костылев, Аликлул минометрава битлатийни дик1аннагу ряхра миллиметралул тийннайну минометрайн тIайлану авцIуну. УрчIцIаллий урчIва процент щун бюхъайссия, бувагу ца процент Аликлул пишакаршиврул бияла. Ваналлив явагу тарг чин къабувну, канил зурзу къакуну биттур бувна тIар хьхьичI бивхьусса мурад.
Шичча лавгру Аликлущал чувшиврий жан дуллусса сержант Аслан Найфоновлул кулпатрахь жижара бан, ванал ятинну ливчIсса душ ххира бан.
Светланан Алик ххуйну кIулну ия, АсланнуцIунсса арсъя тIий бия. СахIилун Аслан цалагу къаккавкссия, кIулссия так Аликлул хавардая. Цуксса мачча хьуну диркIун дурив вайннал кIинналлагу дакIру ххал дара! АьсатIиннал чуттурдая бисмиллагь бувну махъ, жула зумуну алхIам буккин бучIирвав Асланнул рухIирая увкукун: «Зал цар усса, ттул душ. Аслан аьрайн лавгсса гьантлия тийнмай гьаркьини занан бивкIра килисалувун арснал цIуллушиврия майлул чирахъ бишин. Я карамат, кIива цачIун лавчIсса бирияйва мудан, нагу ца Аликлухгу бишайссия. ЧчуччинцIа кIивагу яргну лавхъун бикIайва, цаннийн цагу лавхIуну. Зайннан щукру, ттул кIиягу арс цIуллу-сагъну бур куну лагайссияв. Мукун лавгуна шанма ва бачIи барз. Ца кьини кIивагу майлул чирахъ левщуна лахъайхтува, цаннийн цагу зивзун. Чурххавух сакарат буллуна. Ттуйва нава бакъа бувкIра шаппай. Ахттакьунмай бавуна оьсса хавар. Уттигу ттул канивун тава куццуй, цанницIун ца лавчIуну кIива майлул чирахъ бирияй, нагу кIивагу ла­хъара, кIиягу арснал рухI бигьа-рахIатний дишиннав куну. Тава куццуй цаннийн цагу багьну левщуну лагай».
Яла жу лавгру гайннащал архIал хIатталлийн, Асланнулгу, Аликлул тайми гьалмахтуралгу гьаттардийн биян.
АьсатIиннал агьулданул цIакьну дуручлай бур аьрали аьдатру, хIурматрайсса дур аьралитурахсса бургавугу. ЛичIисса хIатталу дур аьралитуран хасну дурну, шиккугу Украиннал аьрщарай ливтIуми циняв цачIу бучлай бур. РяхцIаллаксса гьав дур февраль зуруя шиннай (вай так ца Владикавказрай бувччусса, цайми шагьрурдай ва шяраваллаву бувччуминная гъалгъавагу бакъа), Асланнуя мукьах урчIа увччуссар тIий бия. Вайннавух ур Донбассрайн гуманитар кумаг лавсун лавгун, тийха авцIуну ивкIсса КIиблалул АсатIиннал халкьуннал артист Роберт Кулумбаговгу.
Гьарцаннал бакIра-бакIрах дур суратру ва аьсатIиннал ттугъру. К1алабарзруми цаннахвагу бувар ттигу бищун. Хасъсса аьрали операция къуртал хьуну махъ, аьрали частирдал бищунтIиссар тIар гьарцаннан цакуццуйсса. АьсатIиннал аьдатрай, мукьцIал лахъаннин гьарца кьини ссят кIинний бучIайсса бур мачча-гъанми хIатталлийн, аьсатIиннал чу­ттурду ва щин ларсун. Жижара бан шавай учIан къавхьума учIайсса ур гиккун. АцIваксса кулпат бия мукьцIал лахъаннин букIлакIисса. АцIра ниттил маоь Казбек зунттул кьабакIрава личлай бия, Терек неххал ххурххугу мунил бугъ буллай бия. БакIра-бакIрах гьарцаннал гьаттардийн иллай, суратирттайх ках тIий ия хъарацIа ка дагьну аьрая зана хьусса, исвагьисса жагьил Азамат, Аликлул хьхьичIунсса дус. Бусан ччай ур цирив, мурччив зурзу тIий, зума ахъан хъанай акъар. Тиха зана хьуния мукьах гьаркьини увкIун, гьарца гьаттайх уккайссар тIий бия.
Зана хьуру жугу АликлуцIун тти танал гьалмахтурахгу аьтIий, тайгу Аликлух аьтIий кьабивтун.