Дагъусттаннал паччахIлугърал технический университетраву марцIну ххювардай вуз къуртал бувсса выпускниктуран ЯтIул дипломру буллалисса шадлугъ хьунни ларгсса нюжмардий. Мероприятиялул дайдихьу дуллай, ректорнал къуллугъ чIумуйну бартбигьлагьисса Назим Баламирзоевлул барчаллагь увкунни дуккавривугу хьхьичIунну, университетрал оьрмулул иширттавухгу гьурттуну бивкIсса студентътурахь, ЯтIул дипломирттал заллухъруннахь.
– Шиная шинайн марцIну ххювардай дуклакисса студентътал гьарза хъанай бушиву вузрал хъуниминнангу ххаришивур. Ларгсса шинал хIасиллу хIисавравун ласурча, цIа данмур чIявуя. Зу ххуйсса гьурттушинна дунни элмийсса хъиривлаявурттаву, ххув хьунну личIи-личIисса конкурсирттай ва олимпиадарттай. Зул хIарачат буну тIийри ДГТУ-лул преподавательтурал коллективгу, республикалий бакъагу, щалва билаятрайгу хьхьичIунминнавух бусса», – увкунни ванал.
ЯтIул дипломру буллуну махъ дурккунни Аьрасатнал Президент Владимир Путиннул выпускниктал барча буллалаврихунсса лаизаву.
Жагьилсса пишакартуран тIайлабацIу чIа тIисса ихтилатру бунни Дагъусттаннал ХIукуматрал хъунаманал хъиривчу Нариман АьбдулмутIалибовлул, жагьилтурал иширттал министр Камил Саидовлул, Халкьуннал Мажлисрал депутатътурал, КIулшиву дулаврил ва элмулул комитетрал хъунмур Елена Павлюченкол ва Национал политикалул, динийсса ва жяматийсса идарарттащал дахIаву цIакь дуллалисса комитетрал хъунама Анатолий Карибовлул. Преподавательтурал цIанияту выпускниктал барча бувна кьатIаллил билаятирттал кафедралул хъунмур, чичу, публицист Нажават Абуевал.
Выпускниктурал цIанияту вузрал хъуниминнахь ва преподавательтурахь барчаллагь тIисса ихтилат бувна выпускник МахIаммад МахIаммадовлул.
Цаппара идарарттащал уртакьну зунсса кьутIирдугу цIакь дуруна. Масалдаран, Бущихъавсса заводращал (ОАО «Ботлихский завод технических средств ЭВМ».) Ректорнал бувсуна вара кьини 30 выпускник даврил дузал хьунтIишиву, 12 предприятие хIадурну душиву выпускниктал давурттал дузал буван. Хъамаллуравусса СКФО-лул Строительтурал гильдиялул президент Аьли Шяъбановлул бувсуна цала гьар шинах выпускниктурал ярмукIалий гьуртту хьунсса хIарачат байшиву ва строительный факультетрал выпускниктурацIун кабакьайшиву давурттай зун.
– ХIакьинусса кьини строительствалул дунияллий квалификация дусса пишакартал чанну бур, ДГТУ-лул ххуйсса пишакартал хIадур бувай. Строительтурал-пишакартурал национальный реестр хIасул дурну дуссар, ва сияхIравун багьаншиврул ххюра шинай зун аьркинссар, стаж бикIаншиврул ва яла квалификациялул экзаменгу дулун. Ва сияхIрай цIанакул ДГТУ-лул выпускниктал кIиазарунниха ливчусса бур», – увкунни ванал. Экономикалуву ва управлениялувусса информацион системардал факультетрал ( факультет информационных систем в экономике и управлении) декан Земфира Раджабовал бувсунни кIулшивурттал хъирив багьсса студентътал чансса бакъашиву цачIава факультетрайгу, хасну щалва университетравугу.
