Жулва душру мусил медаллан лайкь хьунни

Жулва душру мусил медаллан лайкь хьунни

Лавгсса зуруй Сочилий хьусса Дунияллул халкьуннал дянивсса «Сочи – 2022» цIанилусса пленэр-конкурсрай «Декоративно-прикладное искусство» номинациялий мусил медальданун (1-мур кIанттун) лайкь хьунни МахIачкъала шагьрулул оьрчIал художествалул школалул педагог, Хьурттал шяравасса Бариева Саимат МахIаммадлул душ.

Саиматлул дарсру дихьлахьисса Мифталиева Камилла кIава номинациялий лайкь хьунни мусил медальданун (1-мур кIанттун) ва Мифталиева Самира «изобразительное искусство» номинациялий мусил медальданун (2-мур кIанттун).

Вара пленэр-конкурсрай Саиматлул, «Декоративно-прик­ладное искусство» специализациялий даврил пишакаршиву ларай дурну, хасъсса сертификатгу ларсунни.
Сайки вара чIумал Къабардин-Балкьарнаву, Нальчик шагьрулий, хьусса Дунияллул халкьуннал дянивсса «Красота души Кавказа» цIанилусса V конкурсрай заочнайну гьуртту хьусса Мифталиева Камиллал лавсунни 1-мур даражалул лауреатнал диплом. Цинма Саиматлуннив буллунни оьрчIру хIадур баврихлусса, культуралул хазнарду ябавриву ва оьрчIавусса творчествалул гьунарду итххяххан бавриву бихьлахьисса хъунмасса захIматрахлусса Барчаллагьрал чагъар. Шиккува вайннайн оьвкуссия Къиримнаву июль зуруй хьун нанисса конкурсрайнгу.

Вана утти, ва макьала хIадур дурну, кказитрайн дулуннин, Саиматлул хьхьичIуннайшивурттал ххуржинттаву ца цамургу ххувшаву ххи хьунни: Къиримнаву Алушта шагьрулий хьусса Дунияллул халкьуннал дянивсса «Золотые россыпи талантов» конкурсрай Гран-Прилун, Хъунма кубокран ва мусил медальданун лайкь хьунни ва.
Вай гьантрай гьунар бусса педагог ва ванил ученицахъул гьурттусса сюжет ккаккан дунни «Дагъусттан» ГТРК-лийгу.

– Художник-педагог Саимат Бариевая ва ванил кIива ученицая, ссурвал Камилла ва Самира Мифталиевхъая, сакин хьусса МахIачкъалаллал оьрчIал художествалул школалул «команда» ларгссар Сочи шагьрулийн пленэр-конкурсрай гьуртту хьун. Ххал барча, фестиваль тIитIлатIисса шадлугърай сахIналиягу баян бувсса куццуй, Дагъусттаннаясса делегация тикку цалчин гьуртту хьуну бивкIун бия. Цалчин гьуртту шайхтува ххаллилсса ккаккияртту – шанна мусил медаль! Аьзиз­сса школалий вай тийх бусса гьантрай вайннахлу хъинну дакIру цIий бивкIру. Ва даражалул проектрай гьуртту хьун сисаврийну жу къабяйкьуну бияв, – тIий буслай бур ОьрчIал художествалул школалул директор Гюльнара Мамашева.

– Жу хъинну ххариру тихун лагаврия. Бигьагу лавгру, давугу дуварду, творчествалул чулуха хъинну чIявусса затру ккагу ккавккунни, кIулгу хьунни, – тIий бур Саимат МахIаммадовна цуппа.
Вана укун, мюнпат буну, яргсса ккаккиярттайну дайгудирхьуну, гьан дуллай бур гъи жулва художниктал.
ТIайлабацIу буваннав зун вания тихунмайгу гьарца дуллалимуниву.

Читайте также: