Ишбажаранчитурал дастталул цIусса бакIчи

Ишбажаранчитурал дастталул цIусса бакIчи

Уттигъанну «Дагъусттан Республикалул Промышленниктурал ва ишбажаранчитурал союз» тIисса цIанилусса региондалул сакиншиндарал члентурал батIаву хьунни. Ваний гьуртту хьунни Аьрасатнал Промышленниктурал ва ишбажаранчитурал союзрал президент Александр Шохин, ДР-лул ХIукуматрал председательнал хъиривчу Ризван ГъазимахIаммадов, «Завод Дагдизель» АО-лул директорнал хъиривчу Батир Эмеев, Дагъусттаннал Промышленниктурал ва ишбажаранчитурал союзрал президент, ДР-лул Халкьуннал Мажлисрал депутат Сефер Аьлиев ва м.ц.


БатIаврий хьхьичIсса кIира шинал мутталий дурсса давурттал хIасиллу дунни, увчIунни ДР-лул Промышленниктурал ва ишбажаранчитурал союзрал цIусса каялувчи, дунни шанма чул цачIуну зунсса кьутIи: Дагъусттан Республикалул ХIукумат, щалагу Аьрасатнал жяматийсса «Аьрасатнал промышленниктурал ва ишбажаранчитурал союз» организация ва Дагъусттан Республикалул Промышленниктурал ва ишбажаранчитурал союз.

БатIаврил дайдихьу дуллай, Ризван ГъазимахIаммадовлул региондалул бакIчинал цIаниясса махъ лавхъунни.
– Дагъусттан Республикалул БакIчи Сергей Меликовлул цIания цинявннахьвагу ча бувкругу тIий, чIа тIий ура лябукку бусса зузаву.
Промышленниктурал ва ишбажаранчитурал союз хъанахъиссар хъинну бунияла­сса структурану. ЦIана бизнес-сообщество хъанахъиссар хъинну чIявусса кIанттурдай хIукуматран кумагрансса гужну. Баргълагаваллил чулухсса щалларагу дунияллул жуйнма бойкот баян бувсса чIумал тIурча, бизнес-сообщество хъанахъи­ссар яла цIурювкьуми масъалартту щаллу баврийнсса ххуллу-хха ккаккан буллалисса локомотивну. Ва ишираву хъунмасса бияла буссар жулвами, Дагъусттанналми, ишбажаранчитурахьгу, хаснува оборонный комплексравуминнахь, машиностроениялувуминнахь, куклумур промышленностьраву ва химический промышленностьраву зузиминнахь. ХIакьину зул даврил чIарав бацIаву дуллали­ссар паччахIлугърал га яла лахъмур лагрулий, – увкунни вице-премьернал.
Гихунмай Александр Шохиннул бувсуна цалла каялувшиндарай дуллалимур даврия, цIанасса санкциярттал чIумуву промышленностьрацIун ва ишбажаранчишивруцIун кабакьаву мурадрай дуллалисса давурттая.

Сефер Аьлиевлул бувсуна махъсса кIира шинай дурсса давурттая. Ахирданий кIицI лавгуна цалва къуллугърал буржру кьабитлай ушиву ва Союзрал президентнал къуллугърайн Батир Эмеевлул цIа ришлай ушиву. Правлениялул члентал цинявппагу рязину увчIуна Батир Эмеев ва къуллугърайн.
– Барчаллагь ттуйнма укун лахъсса ва жаваблувсса къуллугъ вихшалдарай тапшур баврихлу. На ттулва коллективращал архIал хIарачат буванна бизнесрал ва паччахIлугърал дянивсса ламуну хьун, ттуйнна дурсса вихшала цIакь дуван, – увкунни Батир Эмеевлул.

Читайте также: