Республикалул промышленностьрал ва машлул министр Низам Халиловлул бусласимунийн бувну, ва шинал ахирданийннин жулла республикалул уссал усттартурал планнаву бур рынокрайн цивппа заллусса машлул марка – уссал цIусса бренд дуккан даву.

– ЦIанасса чIумал жулва производительтурал усру дуллали­ссар «Бофф», «ДОФ», «Маратти» ва цаймигу цIардалу. Вай ва цивппа заллусса цаймигу брендирдалу дуккан дуллантIиссару жулла усру рынокрайнгу. Ва иширавусса цалчинсса хIасиллах ялугьлантIиссару ва шинал ахирданийннин, – тIий ур министр.

ЦIанасса чIумал Дагъус­ттаннай ца шинай 3 миллиондалия ливчусса чут уссал бувай­ссар, жулла республикалул ус­ттартал хъунмурчIин зий буссар Каri, Zenden ва цаймигу укунна хъунисса машлул сетирдащал. Му бакъассагу, жулла республикалий зий буссар уссал чIан дутIинсса пресс-формарду дуллалисса Аьрасатнаву бикIанмагу бусса ца предприятие.
– Ва предприятие дукIу Буйнакскалий тIивтIуссар. Ва хъанахъиссар щаллуну «импортозамещающее производство». ХIакьину шиккун дукIлай дур Белоруссиянавасса, Аьрасатнал личIи-личIисса регионнаясса заказругу, – тIий ур Н. Халилов.

Планнайн бувну, «ДОФ+» цIанилусса уссал фабрикалий ва шинал ахирданийннин уссансса супинаторду буллай байбишин най бур. Аьрасатнаву укунсса производство дакъассар, мунияту вагу хъанахъиссар «импортозамещающее».

Министрнал мукунма кIицI лавгуна жулла республика уртакьну зий душиву усру дуллалисса предприятиярттан аьркинмур дуккан дуллалисса «Русс­кая кожа» тIисса сакиншиннаращал.
ЦIанасса чIумал Дагъусттаннай щаллу дуллай бур «Город обувщиков» тIисса проект. Ва ларсун дуссар региондалул 2030-ку шинайннинсса экономикалул чулухасса хьхьичIуннайшиврул модельданувун. Ванийн бувну, усру давриву цIу-цIусса предприятияртту ва идарартту буллан най бур, вай цимурцаннунсса инвестициярттал лагру дур 7 млрд къурушру ва вайннул лагрулий 1, 6 азара инсаннансса зузи кIану щаллу хьун най бур.