Дагъусттаннал БакIчи Сергей Меликовлул ва Ухссавнил Ккавкказуллал региондалий контртеррористический операциярду байсса аьралитурал цачIундур кьюкьлул командующий генерал-лейтенант Владимир Макеевлул дуллунни Украиннавусса хасъсса операциялуву жанну дуллусса аьралитурал наградартту вайннал мачча-гъаннахьхьун. Аьралитурал аьпалун баян бунни минутрайсса пахъ багьаву. Цала ихтилатраву Сергей Меликовлул лавайсса кьимат бивщунни аьралитурал чувшиврун, барчаллагь увкунни вайннал нитти-буттахь, гъан-маччанахь.
Аьралитурал кулпатирттахьхьун ва нитти-буттахьхьун дуллунни Къучагъшиврул орденну. Ца аьраличунал гъан-маччанахьхьун буллунни краповый берет, Росгвардиялул спецназрал къучагъшиврул ва яхIирал лишанну хъанахъисса. Аьраличунан краповый берет булунсса хIукму бувну бур Краповый беретирттал советрал заседаниялий.
Официальнаймур бутIа къуртал хьуну махъ Сергей Меликовлул ва Владимир Макеевлул ихтилат бунни аьралитурал гъан-маччаминнащал, цIухху-бусу бунни миннал багьу-бизулия, хьунабакьлакьисса масъаларттая, бувсунни миннал чIарав бацIан, аьркинсса ка-кумаг бан хIадурну бушиву. Республикалул БакIчинал дакIнийн бувтунни хIакьинусса кьинигу зий душиву аьралитурал кулпатирттан ка-кумаг баву мурадрай тIиртIусса «Все вместе» тIисса фонд.
– Кумаг буллантIиссар вай кулпатру хьунабакьлакьисса цинявппагу масъаларттаву, кIулшивурттал ва цIуллу-сагъшиврулминнуйн бияннин, – увкунни С. Меликовлул.