Ахттиял, Къаякантуллал ва Дукъузпараллал районнай

Дагъусттаннал БакIчи Сергей Меликов ларгсса нюжмардий шанна райондалийн ивунни. Ахттиял райондалий ванал ххал бунни, «Комплексное развитие сельских территорий» тIисса, паччахIлугърал программалийн бувну, шяраваллил кIанттай цIуну буллалисса объектру.


Ахттиял шяраву 120 оьрчIансса школа ххал бувайхту, ванал даву дащуй дирхьунни, тIалав бунни, ххуйсса стройматериаллугу ишла дурну, чIумуй школа бувну къуртал буван. Вара шяраву ивунни гьашину къуртал буван аьркинсса спортрал комплексрайнгу. Райцентрданий буллали­сса «Ласточка» тIисса оьрчIансса багърал проект къаххуй дирзун, Меликовлул «укунсса проектирдайн бувну Дагъусттаннай цичIар къадуллан аьркинссар» увкунни. Ххал бунни Сулайман Стальскийл цIанийсса 1-мур школалул капремонт цукунсса бущилий най ду­ссарив. Ахттиял къала ххал бувну махъ ХIукуматрайн тапшур бунни ва тарихийсса гьайкал цIу дуккан давриха зун ва хъиривмур шинал Ахттиял шяравусса Лениннул цIанийсса куча цIу буккан буван.
Дукъузпараллал райондалийсса Къуруш шяраву ванал аьрай ливтIуминнал гьайкалдануцI тIутIивгу дирхьунни, вара шяраву дуллалисса пожарниктурал-ххассалбувултрал частьгу ххал дурунни. Дагъусттаннал МЧС-рал хъунама Нариман Къа­зимахIаммадовлул бувсунни, шяравалу райцентрдания 26 километралул архну дуну тIий ва туристътал чан къашайсса кIану буну тIий, шикку ххассалбувултрал часть дувансса чарабакъашиву диркIшиву.

Вара кьини Меликов ивунни Къаякантуллал райондалий Аьра­сатнал МЧС-рал зузалтрал Медициналул ва психологиялул реабилитациялунсса центр буллалисса кIанттайнгу. Ва 20 инсаннансса кIану бусса центр бур. Меликовлул центр баврил давурттай рязину ливчIунни. МЧС-рал сотрудниктурал цIуллу-сагъшиврул тагьарданух дагьайкунсса къулагъас дикIан аьркинссар, Каспий хьхьирил зуманив буллали­сса Дагъус­ттаннайсса центргу му мурадрайсса давур увкунни.