Хьунаавкьунни хьхьичIун ливчуминнащал

Хьунаавкьунни хьхьичIун ливчуминнащал

Июль зурул 15-нний Дагъусттаннал БакIчи Сергей Меликов хьунаавкьунни ЕГЭ-рдай ттуршва баллу лавсъсса выпускниктуращал ва Щалвагу Аьрасатнал лагрулийсса олимпиадар­ттай хьхьичIунсса кIантту бувгьуминнащал.

– Республикалий КIулшивур­ттал шинну баян бувсса ва шинал зун хьхьичIунсса кIанттурду бугьансса тIайлабацIу шаву тIааьнсса ишри. Царагу ххувшаву къабигьассар, зу хIарачат був­ссар ххувшаврийнсса ххуллу лайкьну ласун, жул зуйн хъунна­сса вихшала дуссар, – увкунни Меликовлул.
Дуккаврил ва элмулул министрнал хъиривчу Аида ТIал­хIатовал бувсунни оьрчIал ххувшавурттаву учительтурал ва нитти-буттахъал бутIагу бушиву, цуксса гьунар бусса ухьурчагу инсан, захIмат ххирашивугу аьркиншиву, лахьлай, захIмат буллай, кIулшивурттал хъирив багьсса оьрчIру республикалул бучIантIимунийн вихшала цIакь дуллалими бушиву.
Дарбантуллал райондалий­сса Хазардал школалул выпускник МахIаммадсаэд Рамазановлул бувсунни цува, тарихрал экзамендалул 100 балл ласун­сса кьасттирай, хъинну хIадур хъанай ивкIшиву, хIарачатрал хIасиллу ххуйсса хьушиву. Ингилис мазрал олимпиадалий ххув хьу­сса ПатIимат Ссамадовал бувсунни цуппа 4-мур классраву дуклакинийва личIи-личIисса олимпиадарттай гьуртту хъанай бивкIшиву.
ХьхьичIун ливчусса циняв оьрчIан ва вайннал насихIат­читуран дуллунни ттурш-ттур­шазарда къурушрансса сертификатру. Шиккува кIицI лаган, 100 азарда къурушран лайкь хьуминнавух бур ЦIуминалийсса ЦIуссаккуллал школа къуртал бувсса Маккаева Алинагу. Ва, ЦIуссалакрал райондалул дуккаврил тарихраву ЕГЭ-дал яла лахъми баллу лавсъсса выпускница хIисаврай, рекордсменка бур. Ванил оьрус мазрал экзамендалул 100 балл лавсун бур, химиялул 99 балл, биологиялул 91 балл ва гьанулул математикалулгу бур лахъсса балл.

Аватар

Патимат Рамазанова

Заслуженный работник культуры РД

Читайте также: