Инсаннал биччибакъулшиву хьхьирил къадухIайссар!

Инсаннал биччибакъулшиву хьхьирил къадухIайссар!

Дагъусттаннай щинавун бучIай чIумул дязаннивсса мутталий уттинин оьвкьун ур 29 инсан. Вайннавагу 11 – балугъравун къабивсса мюрщи оьрчIру!

Гьарца гъинттул жулла республикалий цIусса хавардал сияхIрал хьхьичI ххуттай чан къашай: «Лахьхьу хьхьирий 2 инсан оьвкьун ур», «чуврив неххавун оьрчIру бювкьун, ми ххал буллай бу­сса бур» тIисса щинавун халкь бюкьавриясса тIарду. Укунсса ишру интернетрал ва социал сетирдал бияла ххи хьуннингу бивкIссарив къакIулли, цIана тIурча, гьантта ляхну социал сетирдаву «инсан щинавун оькьавриясса» хаварду чанвагу хъанай бакъар. 
Вайксса агьлу хьхьиривун ва неххардивун бюкьлакьаврил агьамми сававртту цири тIисса ва журналистътурал цаймигу суалла­хьхьунсса жавабру дуллунни июльданул 20-нний «Дагестанская правда» кказитрал редакциялий хьусса пресс-конференциялий Дагъусттаннайсса МЧС-рал хъунаманал хъиривчу, ГИМС-рал хъунама инспектор Муслим Муслимовлул. 

– Мяйжаннугу, агьлу щинавун бюкьлакьаврил статистика шиная шинайн хъунна хъанай дур, ваницIун укунми иширттаясса информация ччяни  ппив шаврилмур статистикагу. Цалчинна-цалчинмур савав дур инсаннал биччиба­къулшиву, бала-апатIрая нигьа къаусаву, кIукъакIулсса кIанай щинавун бучIлай, цала цивппа нигьачIишивручIан кIункIу баву.

Масалдаран, гужсса марч бусса ва хьхьирий щатIив лахъсса чIумал, агьали, нигьакъабувсун, оьрчIащал, кулпатраву буцириннащал бур хьхьиричIан кьювчуну най. Вана уттигъанну МахIачкъалаливсса «Березка» тIисса пляжрай гужсса марч бу­сса кьини бювкьунни балугъравун къабивсса 1 душ ва 1 оьрчI. Душнил жаназа  гава мугьлатрай ляркъуну дия жул пишакартурал, оьрчIалсса тIурча, ляркъунни 3 гьантлува.


Муслим Муслимовлул бусаврийну, «пляжрал сезон» дайдирхьуния шийнай вай­ннал пишакартурал хха­ссал увну ур щинавун оькьлакьисса 46 инсан. Вайннавату – ца турист, ливчIми – жула дагъусттанлувтал.


Ялагу ца иш. Къизлардал райондалийсса ца шяраваллил чIаравсса каналданувун бювкьун бур 4-5 шиннардивусса 2 душ. Мюрщи оьрчIру бюкьлакьаврил агьаммур сававгу ургала акъа личIаврихьри ду­сса, хъунасса инсан га мугьлатраву чIарав къалякъавриву.

Шамилчинмур сававгу дур щинавун бучIан къадагъа дусса, цIуллу-сагъшиврун зарал хьун­сса кIанттурдай агьали щинавун бучIан нигьа къабусаву. Шиккугу, масалдаран, кIицI банна ва ларгсса алхIаткьини оьрмулул 25 шин хьусса жагьил, Ирганайскаллал бартхьхьиривун 15 метралул лахъшиврия тIанкI куну, щинава къаувксса иш хьушивугу. Укунсса кIанттурдай щинавун бучIлан, хаснува чIанулу ци дуссарив къакIулсса кIанттурдай къабуч1иссар.

«Циванни агьали щинавун бучIайсса кIанттурдай МЧС-рал ххассал бувулт чанну бикIайсса?» – тIисса суалданухьхьун Муслим Муслимовлул увкунни, Да­гъусттаннал ХIукуматрал хасъсса хIукмулийн бувну, щинавун бучIайсса кIанттурдай ххассалбувулт бикIан багьлай буссар га кIанттул жаваблувшиву дуллалисса залуннал харжирацIух бувгьусса. Масалдаран, Ма­хIачкъалаллал пляжирттай би­кIан багьлай бур хъуншагьрулул администрациялул жаваб­лувшиврулусса ххассалбувулт. Муслим Муслимовлул бусаврийну, хIакьинусса кьини Да­гъусттаннайсса циняр муниципалитетирттава так ца Дарбантуллал каялувчитал, ва масъалалул ялув бавцIуну, агьали  щинавун бучIайсса кIанттурдай, бивхьуну харжругу, ххассалбувулт бувгьуну бур.

Бувсунни хъунама инспекторнал ялагу, гъинтнил каникуллу дайдишин хьхьичI, вайннал пишакартурал ва масъалалийн багьайсса ихтилатру байшиву республикалул школар­ттай оьрчIащалгу. Шикку вайннащал дувайсса дур инструкциялул даву – щинавун бюкьлакьийни ци бан аьркинссарив, къабучIисса кIанттурдай щинавун бучIаврия хъуннасса нигьачIишиву душиврия ва цаймигу иширттая.

Муслим Муслимовлул бусаврийну, «пляжрал сезон» дайдирхьуния шийнай вайннал пишакартурал ххассал увну ур щинавун оькьлакьисса 46 инсан. Вайннавату – ца турист, ливчIми – жула дагъусттанлувтал.

Читайте также: