Вай гьантрай оьрмулул 80 шинал юбилей кIицI лаглай ур чIярусса шиннардий дукра даврил
системалуву зий ивкIсса, дукралул хIаллихшиннардал специалист-технолог,
КIулушацIрал шяравасса ХIажи-ХIусманнул арс Сани Сулайманов.
Цимилгу исват хьунни cовет заманнай вузру къуртал бувсса, махъ ацIан цучIав акъасса, оьрму-хIал ккавксса инсантал, цала хIарачатрайну хъунисса даражалул пишакартал хьуну, бусраврай оьрму бутлай бушиву. Цала язи бувгьусса ххуллий хьхьичI бивхьусса мурадру бартбивгьуну бур Санинал так цала куртIсса кIулшивурттайну ва чIярусса шиннардий бувсса хъунмасса захIматрайну.
Увну ур Сани дяъви нанисса 1942-ку шинал. Ванал ппу Сулайман дяъви къуртал хьунцIакул талай ивкIун ур. ЧIивисса Санинан ппу дяъвилия зана хьусса чIун дакIний ча дикIанссия. Дяъвилия зана къавхьуну ур Санинал ниттиуссугу. Совет Союзрал Виричу хьуну дяъвилия увкIссар Санинал ссурахъу Ризван Сулайманов.
«На мудангу пахру-ххаралий икIайссияв нава Совет Союзрал Виричу Ризван Сулаймановлул ссурахъу ушиврия. Мунал къучагъшиврийсса аьрали ххуллу ва аькьилсса насихIатру хьуссар ттун оьрмулунсса дарсруну», – тIий буслай ур Сани.
КIулушацIрал шяраву 7 классгу къуртал бувну, гихунмайми классру бувккуну бур ванал Гъумук. Санинал школа къуртал бувсса 1960-ку шинал вайннал кулпат бивзун бур МахIачкъалалив. Дуклан ухханнин ца шинайсса Сани зий ивкIун ур ссяткарну. Ва цала пиша бакъашиву бувчIуну, ацIан къахъанай ивкIун ур шин гьаннин дуклан уххан, лайкьсса пиша лахьхьин. Шагьру, поезд цирив къакIулну, цана цувалу лавгун ур Ленинградуллал машлул институтравун уххан. ХьхьичIунсса хIасиллай экзаменнугу дуллуну, увххун ур технолог шайсса отделениялийн.
Сани ХIажи-ХIусманович хъанай ур Дагъусттаннай цалчин ларайсса кIулшиву ларсъсса дукралул хIаллихшиннардал пишакар-технолог.
Институт бувккуну махъ, жагьилсса пишакар тIалав увну ур Дагъусттаннал аьшвашханардал ва рестораннал системалул пишакар-технологну. АрхIала зий ивкIун ур ресторандалул директорнугу.
Сани ХIажи-ХIусманович хъанай ур Дагъусттаннай цалчин ларайсса кIулшиву ларсъсса дукралул хIаллихшиннардал пишакар-технолог.
1997-ку шинал Сани ивтун ур Дагъусттаннал Агьалинан дукрарду даврил сертификатру дулайсса центрданул экспертну. Агьалинан дукрарду дуллалисса предприятиярдан сертификатру дулун ихтияр дулайсса жаваблувсса даву сантирайн руртун диркIссар Санинал каялувшиндаралу. Пенсиялийн укканцIакул ва ивкIссар Дагъусттаннал кафердан, рестораннан, банкетный заллан, выпечкарттан сертификатру дулайсса отделданул хъунаману зий.
Республикалий дукрарду даврил технологиярттал нормарду дуруччаву мурадрай, миннуха зузиминнан кумаг хIисаврай, Санинал итабавкьуну бур «Энциклопедия кулинарного искусства. Технологические нормативы для предприятий общественного питания» тIисса лу.
«Дагъусттаннал регион ишбажаранчишиврул чулуха хъинну итххявхсса инсантал бусса дур. ТIит1лай бур шаттираха шаттирахун цаннияр ца ххаллилсса ресторан, каферду. Дуллай бур дукрарду. Амма цуя ца акъар технологиярттал нормарду дуручлачисса. Гьарица дукралул дуссар цила нормарду дусса рецептру. Утти жучIава мукунсса пишакар аьркинну акъа чIалай бур. Дукрарду даврил системалуву зузисса инсантал бур цахунма цивппа бивчуну.
ЧIярусса продукты экьи -дичлай бур. ХьхьичIава кафе-ресторанну тIитIин хьхьичI маслихIат ккаккан бучIайва. Мунияту, ттун пикри хьуна жула инсантуран вай иширттаву кумаг хIисаврайсса кулинариялул энциклопедия итабакьинсса», – тIий ур Сани.
Цинявннан кIулсса куццуй, кьатIу-шав агьалинал дукрарду дукайсса кIанттурдай меню хьхьичIун лавсун бучIай. Меню кафе-рестораннал «паспортри» тIий ур Сани ва му сакин дурну дикIан аьркинссар паччахIлугърал стандартирттал ккаккан дурсса рецептирдайн чул бивщуну. Аммарив, нажагьсса бур республикалий ва низам дурурччуну зузисса кIанттурду, тIий ур ва сфералуву зий хъунмур оьрму гьан бувсса лавайсса даражалул пишакар.
Ва сфералуву зузисса хIаллай Санинал лайкь дурну дур цикссагу ХIурматрал грамотартту ва агьалинал чулухасса барчаллагьру, сантирайн руртун дур дукрарду даврил сфералул низам.
Цума-цагу инсаннал оьрмулуву агьамсса кIану бугьлай бур бавкьусса, кувннан кув бувчIайсса кулпатрал. Сани ичIувагу низам ххирасса инсан ур. Цала кулпат Женящал, ххуйсса тарбиягу дуллуну, хъуни бувну бур арс ва душ. Ванал арс ур цIана Москавлив хъинну хъуннасса ва хьхьичIунсса предприятиялий каялувшиву дуллай. Арснал ва душнил оьрчIру дуклай бур Москавлив ва Испаниянаву.
Сани ХIажи-ХIусманович цIана ялапар хъанай ур Москавлив. Ватандалия архну ялапар хъанай унугу, ванан дакIнийхтуну ххирар цала жямат. Цува лявхъусса, чIивиний оьрму лавгсса КIулушацIрал шяраву дурну дур ххаллилсса къатри.
Юбилейращал барчагу уллай, чIа тIий буру Санинан цIакьсса цIуллушиву, кулпатраву нахIу-хIалимшиву. ЛичIаннав ина вила кулпатраягу, наслулиягу щалихханнин.
