МахIачкъалалив, М. Горькийл цIанийсса Оьруснал театрданул Хъунмур залдануву, хьунни Дагъусттаннал халкьуннал шаэр Фазу Аьлиева ниттил бувну 90 шин шаврин хас дурсса вечер.
Мажлис байбивхьуна Фазу Аьлиевал шаэрнал гьунарданул ва жяматийсса давурттал ккаллишиврул мукIрушиннану хьусса ца яргсса иширая – ванин Аьрасатнал Президент Владимир Путиннул Святой апостол Андрей Первозванныйл орден дуллусса ппурттувусса видеолия.
Региондалул БакIчинал чулуха махъ лахълай, ДР-лул ХIукуматрал председательнал хъиривчу Муслим Телякавовлул цалва ихтилатраву чIурчIав дурна Фазу Аьлиевал чIяву миллатру бусса Аьрасатнал литературалуву бивхьусса хъунмасса бутIуй, ванил аьрасатнал ва совет поэзиялул тарихраву чирчусса яргсса чIапIуй.
Дагъусттаннал Чичултрал союзрал председатель МахIаммад АхIмадовлул кIицI ларгуна тIайлашиву, инсаншиву ва хъиншиву шаэрнал художествалул творчествалул агьамми лишанну хIисаврай.
Дагъусттаннал Хъаннил союзрал председатель Интизар Мамутаевал цилвамур ихтилатраву дакIнийн бувтуна 90-ку шиннардий Аьрасатнал саллатIнал ниттихъайн цилла кIирисса дакIнива нанисса мукъурттийну оьвчавуртту дуллай бивкIсса Фазу Аьлиева хьуну бивкIшиву дунияллул терроризмалущалсса талатаврил ца лишанну, кIицI лавгуна цIанасса ва хъирив нанисса никирттан ва хъанахъишиву бюхттулсса учительну, оьрмулул луну, цувгу бусса оьрмулий ккалан аьркинсса, цивусса ванил шаэрнал, ниттил, ссил дарсругу лаласлай.
СахIналий ва хьхьуну дурккуна шаэрнал назмурду, щаллу бувна ванил мукъурттийсса балайрду. ЦIа дурксса «Лезгинка» ансамбльданул ккаккан бувна ябацIансса номерду. Ва коллектив бакъасса, ва хьхьунусса литературалул ва музыкалул вечерданий гьуртту хьуна Оьруснал, Лакрал, Яруссаннал театрдал, Дагъусттаннал Опералул ва балетрал театрданул артистътал, Поэзиялул театр, Т. Мурадовлул цIанийсса Дагъусттаннал филармония, ЧIарадиял райондалул арамтурал «Поющая Чарода» хор, Б. Мурадовал цIанийсса Дагъусттаннал культуралул ва искусствалул колледжрал студентътал ва оьрчIал ва чIава жагьилтурал къавтIаврил «Хасавюрт» ансамбльданул артистътал.
Театрданул жанахIраву дия ва таварихран хасну А. Тахо-Годил цIанийсса Дагъусттаннал Национал музейрал ва Р. ХIамзатовлул цIанийсса Национал библиотекалул хIадур дурсса суратирттал ва луттирдал выставка.
