Дагъусттаннал ЗахIматрал министерствалул укра кIулшивуртту дуллалисса «Демография» тIисса миллатирттал проектрал лагрулий агьалинал чулуха кьамул бувсса 1000-нния ливчусса аьрзарду ххал бивгьуну бур.

Ва министерствалул биялдарайсса Агьали давурттал дузал буллалисса центрдай хIасул бувну буссия уква пишарду ла­хьхьинсса кIулшивуртту дулла­ли­сса процесс. Проектрал кумаграйну, ахIвал кIюласса кулпатирттавасса инсантураща ла­хьхьин бюхълай буссия цIанасса заманнай тIалавшиннарду дусса пишарду.
Проектравух гьуртту хьун ихтияр дуссар ялавай кIицI лавгсса категориялул инсантурахь:
– 50 шинавусса ва гихунмай­сса оьрмулул ва пенсиялийн бу­­ккан чIирисса чIун лирчIсса инсантурахь;
– оьрчIан шанна шин хьуннин отпускалийн бувксса хъаннихь;
– давурттай къазузисса, 7 шинавун бияннинсса оьрчIру бусса хъаннихь;
– 35 шинавун бияннинсса аьра­ли къуллугъ бувния шийнмай давурттай къазузисса инсантурахь;
– кIулшивуртту ласаврил документ бусса ва му лавсния шийнмай давурттай къазий 4-нния ливчусса барзру хьусса инсантурахь;
– дянивсса профессионал ва ларайсса кIулшивуртту дакъасса ва пишардал хасъсса программарттай кIулшивуртту къаларсъсса инсантурахь;
– идарартту лакьлай, ягу штатру чан буллай, давуртта­цIа хьунсса нигьачIаву дусса инсантурахь;
– гьашинусса шинал пишарду лахьхьаврил программар­ттайн бувну кIулшивуртту ласласи­сса ва республикалул агьали давурттал дузал байсса центрданийн хасъсса пишардайн бувсса давурттал дузал къабув­сса инсантал;
– даву дакъасса агьали.
КIулшивуртту дулаврил программартту дур очнайсса ва заочнайсса журалийсса, кIира нюжмардия шанма зуруйн бияннинсса мутталийсса. Ихтияр дур мукунна ва программалий манзилданул журалийн бувнугу кIулшивуртту дуллан.
Шиккува кIицI лаган, «Содействие занятости» программалул лагрулий пишардал кIул­шивуртту ларсъсса 75 % инсантурал АьФ-лул ЗахIматрал министерствалул ва Дагъусттаннал ХIукуматрал дянив дурсса кьутIилийн бувну давурттал дузал буллалиссар.
ХIукуматрал чулухасса хIа­ллихшиннардайну кIулши­вуртту ласунсса аьрзарду бу­лун бюхъайссар «Работа в России» тIисса цифровой плат­формалийхчIин ва Агьали давурттал дузал байсса центрдайхчIин.
Агьалинал чулухасса аьрзарду кьамул бувну махъ электрон адресрай бучIантIиссар кIулшивуртту ласаврил хIакъираву бувчIин бавуртту дуллалисса чагъар.
ДакIнийн бутанну, 2022-ку шинал Дагъусттаннай ва проектрал лагрулий 1820 инсаннан пишардал кIулшивуртту дулунсса ният душиву.
Пишардан хасъсса кIул­шивуртту дуллалисса идарарттал сияхIраву бур «Академия «Каспий» ЧУ ДПО, МахIач­къалаллал технический колледж, МахIачкъалаллал строительствалул ва дизайндалул колледж, МахIачкъалаллал автомобиллал колледж, «Вип М.Ю.» Кулинар искусствалул центр, Каспийскаллал машиностроениялул ва сервисрал колледж, Дарбантуллал педагогический колледж, Буйнакскаллал Ш.И. Шихсаидовлул цIанийсса шяраваллил хозяйствалул колледж ва цаймигу.
Ххишаласса кIулшивуртту дуллалисса программарттал лагрулий лахьхьин буллай бур республикалий тIалавшиннарду дусса пишарду: гид-экскурсовод, туризмалул менеджер, социал зузала, мюрщими классирттал педагог ва ц.