Ларгсса ххамискьини Дагъусттаннал БакIчи Сергей Меликов ивунни Рутуллал райондалийн.

ХьхьичIва-хьхьичI ванал райондалул каялувчитуращал Буттал кIанттул цIанийсса Хъун дяъвилий гьуртту хьуминнансса гьайкалдануцI тIутIив дирхьунни. Райондалия аьрайн лавгсса шаназарунниха ливчусса фронтовиктурал аьпалул хIурмат бувну махъ, Меликов ивунни Рутуллал № 1-мур школалийн. Ванал цува школалийн иянтIишиву баян къабувну бивкIун бур, мунияту школалул директорнангу къабигьасса суаллахьхьун жавабру дуллан багьну бур. Мяйжанссар, хаварбакъулийсса хъун хъамаличуная ххари хьуну бур школалийсса гъинтнил лагерьданийн заназисса оьрчIру. Школалул хъирив Меликовлул ххал бунни кIанттул поликлиника цукун зий бурив, тиккува ихтилат бунни Шиназуллал шяраву 45 шинай математикалул дарсру дихьлахьисса, хIакинначIан бувкIсса, Зажигьар Мирзабековащал.