Июль зурул 13-нний Дагъусттаннал БакIчи Сергей Меликовлул республикалий экономика гьаз дуваврин хас дурсса совещание дунни.
Ванал бувсунни Федерациялул Советрал спикер Валентина Матвиенкол республикалий кIива гьантлийсса аьрххилий бунува цукунми масъаларттах къулагъас дурссарив. Бувсунни хьхьичI ххуттайн лавсъми масъаларттавух бушиву МахIачкъалаллал аэропортрал реконструкция, Машлул порт цIубуккан буваву ва туризмалул даву сантирайн рутаву. Гьаз бунни совещаниялий Избербашрай цIусса азархана буваврил масъалагу. 2009-ку шинала Избербашрай 300 къашайшалансса азархана буллай байбивхьуну бур, амма 2014-ку шинал ва буллалисса даву дацIан дурну дур. ДукIу Меликов ва азархана буллалисса кIанайн цува ивну, даву лябуккулий дачин дуван тапшур бувссия, амма тагьар даххана хьуну дакъар. Меликовлул тапшур бунни август зурул цаннийнин чара бакъа азарханалул хIакъиравусса хIукмулия баян буван, даву хъит учин дуван ччясса мутталий. Совещаниялий цивппа ялувбацIаву дуллалисса ведомствардал даврия бувсунни вице-премьертурал Манвел Мажонцлул, Ризван ГъазимахIаммадовлул, Мурад Казиевлул ва Муслим Телякавовлул. КIулшиву дулаврил ва элмулул министр ЯхIия Бучаевлул бувсунни школарттай капремонт даврилмур даву цукунсса бущилий най дуссарив. Дагъусттаннал хъунаманал дащуй бивхьунни даву чIумуй къадуллалисса школартталсса буван буржлувми. Масалдаран, Шамильский райондалийсса Хебда тIисса шяравусса школалийн ларгсса шинал, июль зуруй, Меликов цува ивну ур ва тапшур бувну бур 1959-ку шинал бувсса школа бухьувкун, анаварну федерал программалувун бутан. Бучаевлул бувсунни, аьркинсса документру дузал къавхьуну тIий ва федерал программалувун бутан къавхьуну ливчIшиву. Сергей Меликовлул увкунни, иш мукун багьарча, региондалул программалувун бутан аьркинссия, тапшур бувну бухьувкун школа ремонт буван, муниха зун аьркинссия куну. Манвел Мажонцлул бувсунни кIинттулнинсса хIадуршиндарая, ЖКХ-лул объектру багьайкун хIадур буваншиврул, хасну ми иширттал хъирив бавцIусса республикалул штаб хIасул бувну бушиврия. Ахирданий Меликовлул барча бунни Дагъусттаннай бургъил кумаграйну зузи бувсса цалчинсса электростанция тIитIаврищал.
