Матвиенкол тамаша бунни Дагъусттаннал усттартурал каруннил дурмуний

Дарбантлив, Нарын-Къалалий, Валентина Матвиенкон ва Сергей Меликовлун ккаккан дурунни Дагъусттаннал халкьуннал художествалул промыслирдал усттартурал каруннил дурсса давуртту: «Кизляр» предприятиялул бувсса ярагъ, Бархъаллал тIахIунтту, Оьргърал ва ГьуцIалттиял заргалтурал дурсса чIюлушиннарду, табасараннал бартбисуртту ва цаймигу затру.


Усттартуращал цащалвасса ихтилатраву Федерациялул Советрал спикернал барчаллагь увкунни аслийсса культура дуручлачаврихлу, оьвчаву дурунни, личIи-личIисса гьунарду бусса усттартурал никирттал дянивсса дахIаву руцан къаритан, шайссаксса жагьилталгу кIункIу буллан уку-укунсса пишардавун.
Табасараннал райондалия­сса 8 шинавусса душнил ва ванил ниттил бувсуна Валентина Матвиенкохь бартбисуртту щащаврил кьюлтIшивурттая. Халкьуннал каруннил пишардал цайми усттартуращалгу бувна спикернал вара мяъна-мурадрайсса ихтилатру.

Валентина Матвиенкохь Сергей Меликовлул бувсуна «Кизляр» предприятиялийн дуллали­сса турмаршрутирттая, мукунна дуллалисса ва дуллан дакIнийсса цаймигу давурттая.
Дагъусттаннал Хъаннил союзрал председатель Интизар Мамутаевал Валентина Матвиенкон пишкаш дурна усттарсса дагъусттаннал хъаннил карунних дурсса лачак ва дуллуна Дагъусттаннал халкьуннал шаэр Фазу Аьлиевал 90 шинал юбилейрайнну Союзрал дуккан дурсса цалчинсса медаль. Бувсуна цилла каялувшиннаралусса Союзрал дуллалисса давурттая.
Ахирданий бавтIминнал хьхьичIун бувккуна цIа дурксса «Лезгинка» ансамбльданул къавтIалт ва Дагъусттаннал пагьламантал.
Ккавкмунил цимурцаннул хIайран бувсса Валентина Матвиенкол, жулла республикалухь цуппа хъамалу баврихлу барчаллагь тIий, увкуна:
– Зу ялапар хъанай буру ляличIисса кIанай, шикку ляличIисса магнетизм, бувчIин къашайсса гуж бур. Мунияту духьунссар зул каруннища цимурца дуван бюхълахъисса, – куну.