Бивунни Дарбантливгу

Июльданул 12-нний Федерациялул Советрал Председатель Валентина Матвиенко ва Дагъусттаннал БакIчи Сергей Меликов бивунни Дарбантлив.


[dropcap]Ф[/dropcap]едерациялул Советрал спикернал жулла республикалийн­сса даврил аьрххилул кIилчинсса кьини ларгунни Аьрасатнал Халкьуннал культуралул ирсирал шинал лишандалулу.
Жулва билаятрал ца яла хьхьичIавамур шагьрулий, ца яла хьхьичIавамур ва машгьурмур къалалий – Нарын-Къалалий, Валентина Матвиенко хьунабавкьуна так ва шагьрулун хасъсса нацIушивурттайну.

Республикалул кIива гьантлийсса бусравсса хъамалудушнин ккаккан бувна хIакьину ЮНЕСКОлул щаллагу дунияллул культуралул ирсирал гьайкалну хъанахъисса, VI-мур ттуршукулий бувсса къала. ТIиртIусса ссавнилусса музейран ккаллийсса, 4,5 гектар аьрщарайх бивхьусса, цил чIирттал лахъишиву 700 метра, лахъшивурив кув кIанттай 20 метралийн диллалисса Нарын-Къалалий гъирарай тамаша бувна ванил.