Валентина Матвиенко ва Сергей Меликов бивунни Украиннай нанисса аьрали операциялуву къучагъшиву кка­ккан дурсса НурмахIаммад ХIажимахIаммадов дуклай ивкIсса МахIачкъалаллал 42-мур школалийн.

Дунияллул халкьуннал дянивсса «Историческая память» тIисса проектрал лагрулий 42-мур школалул чIирайн лархъссар Виричунал аьпа абад буллалисса ула. Сергей Меликовлул ва Валентина Матвиенкол дирхьунни микку тIутIив. Укунсса мемориалданул ултти лахълахъиссар Аьрасатнал Виричунал цIа ларсъсса цинявппагу аьралитал дуклай бивкIсса школарттай.
ДакIнийн бутан, гвардиялул хъунама лей­тенант НурмахIаммад ХIажи­махIам­мадов Украиннаву хасъсса аьрали операция нанисса чIумал цалчинсса гьантрайва десантно-штурмовой бригадалуву ляличIисса бигар тапшур бувну къинттуллухун тIайла увккун ивкIссар. Гуж ххишаласса душманнал вив лавсукун, захIматсса щаву дирну унува, махъра-махъсса патрон харж даннин талай ивкIссар. ЛирчIсса гранаталух ванал цувагу, лагма лавгсса душманталгу пIякь учин бувссар.
НурмахIаммад хьуссар Донбасс буручлачисса хасъсса операциялуву цалчин Аьрасатнал Виричунал цIа ларсъсса аьраличу.
Школа ххал буллай, Сергей Меликовлул бувсунни ялунчIил ванил реконструкция дантIишиву.
– Жува Виричу дуклай ивкIсса школа ванал цIанин лайкьсса даражалийн буцин аьркинссар. ЯлунчIил мунил хIакъиравусса программа хIадур дан аьркинссар, – увкунни региондалул БакIчинал. МахIачкъалаллал мэрнал хъиривчу Эмилия Раджабовал барчаллагь увкунни Дагъусттаннал БакIчинахь ва хIукмулухлу.
– Сергей Алимовичлул каялувшиндаралу республикалий патриот тарбиялух хъуннасса къулагъас дуллай бур. Так ца школалийсса дарсирдая бакъар ихтилат, инфраструктуралиягур, – увкунни ванил.
Валентина Матвиенкол лавайсса кьимат бивщу­нни Нур­махIаммад ХIажима­хIам­мадовлул ва цаймигу хIакьину Украиннаву аьрали бигарду бартбигьлагьи­сса дагъусттанлувтурал къучагъшиврун.
– ЦIанасса чIумалгу Украиннаву хасъсса операциялуву гьуртту хъанахъисса Дагъусттаннал аьралитурал ккаккан дуллай бур къучагъшиву. Вай республикалулгу, Аьрасатналгу хIакьсса патриотъталли. Дагъусттаннаща пахру бан бюхъайссар цала арсурваврая. Дагъусттанная, Аьрасатнал Вирттал бакъассагу, дунияллул даражалийсса элмулул ва культуралул ишккаккулт, цIанихсса чичулт бувкссар. Вирттал укунма къаляхъайссар. Ва Дагъусттаннал халкьуннал ирсирай нанисса яхI-къириятрал ишри, – увкунни Валентина Матвиенкол.