Ларгсса нюжмардий Дагъусттаннайн бувкIуна Аьрасатнал Федерациялул Советрал Председатель Валентина Матвиенко. Ва МахIачкъалаллал АхIмад-Хан Султаннул цIанийсса аэропортрай хьунабавкьуна Дагъусттаннал БакIчи Сергей Меликовлул ва сенатор Илияс Умахановлул.

Цалчин Матвиенкол ххал дурна аэропорт цIу буккан буллалисса давуртту цукунсса бущилий най дуссарив. Аэропортрал ялтту бувккун мукьах, ванил ххал бувна Каспийскалий бувсса оьрчIансса багъ. Ва «Демография» национал проектрал лагрулий бувсса, 250 оьрчIансса кIану бусса детсад бур, цуппагу цIусса дуккаврил шинал оьрчIру кьамул буван хIадурсса. Тиккува ххал бувна меценатнал хIарачатрайну буллалисса 200 оьрчIансса кIану бусса детсадгу. Ххал бувна мукунма «Образование» нацпроектрал лагрулий буллалисса, 1224 дуклаки оьрчIансса цIусса школагу.

Ххал бувна Москавлиятусса хъуни хъамаллурал делегациялул «Лезгинка» ансамбльданун буллалисса цIусса «КъавтIаврил къаттагу». Мукьра зивулийсса къатри дуллай бур Каспий хьхьирил зуманив.

Бивуна делегация МахIач­къала­ллал 42-мур школалийн, утти­гъанну школалун цIа дирз­сса, Аьра­сатнал Вири­чу Нур­махIаммад ХIажимахIамма­дов­лул аьпалул хIурмат буван. Федерациялул Советрал спикер халкьуннал шаэр Фазу Аьлиева яхъанай бивкIсса къатрал чIирай мармарчарил ула цIакь дуллалисса мероприятиялийгу гьуртту хьуна. Республикалий социал-экономикалул тагьар къулай дуваву мурадрай­сса агьамми масъалартту гьаз буллалисса совещаниялий Валентина Матвиенкохь бувсуна Аьрасатнал оьрчIансса центр тIитIин хIадур хъанай бушиврия, транспортрал тагьардания ва гьарца къювусса буруккин­ттая. ОьрчIал центрданул проектрал хIакъираву ванил укун увкунни:
– Каспий хьхьирил зуманив­сса оьрчIансса центрданул проект ххуй дирзунни. ОьрчIру бигьалагансса ва миннал реабилитациялунсса къулайсса шартIру дузал дурну дур. Ва цалчинмур ятIапри. Гихунмай Каспий хьхьирил зумардай утти­заманнул курортру бавриха зунтIиссару, ва тIурча, цамур тарихрал дайдихьур.
Хъирив кьини ванил ва хъамаллурал аьрххи бия аьвзалзаманнул Дарбантлив. Ти­кку, Нарын-Къалалийнгу бивну, цайми кIанттурдайхгу був­ккун мукьах, дагъусттанлувтурахь барчаллагь тIий, Матвиенкол увкунни: – Зу уникальнайсса кIанттурдай яхъанай буру, ши­кку цукуннивсса макьнатIис ва энергетика дур. ХIайранна! Муниятурвав зуща гьарзат дуван хъанахъиссагу!