Азирбижаннаву яхъанахъисса ва зузисса жулва лакку хъамитайпалул, журналистка, филологиялул элмурдал кандидат СалихIа Аьлиевал Фейсбукрай чивчуна Азирбижаннал лайкь хьусса журналист, публицист Фаик Закиевлул (2019-ку шинал дунияллия лавгссар ва Бакуйннал хIатталлив увччуну уссар) гьаттайсса чартту бувккун, экьибивчуну бушиву. Ва хавар ттун ххишала бакъа кьурчIи бивзуна. Цаппара шиннардил хьхьичI Пятигорскалий Апанни Къапиевлул гьаттайгу вандалтурал укунна­сса гъургъаза дурссия. Жуна цинявннан кIулсса, бусравса заргал Аьлил АхIмадовлул (Кисловодскалий мина дирхьусса), гьалмахтуращал лавгун, гьав, лази-лакьи дурну, дакьин дурссия.

Чичултрал ва журналистътурал рухIирдащал талатисса «вир­тталгу» чан къашайсса замана бур. ДакIнийн бутанну Фаик Закиев жула машгьурсса чичу, шаэр ва аьлимчу Закухъал Курдил арс ушиву. Фаиклул тамансса макьалартту, таржума дурну рирщу­ссия «Илчи» кказитрай, цувагу увкIссия МахIачкъалалив редакциялул коллективращал кIул хьун. Азирбижаннал лайкь хьусса журналист акъагу, ва ур А. Аьлиевлул ва Г. Зардабил цIанийсса «Золотое перо» премиярттал лауреат. Цилва тIийкун, СалихIа цимилагу хIатталлил комендантнайн бувккун бур, гьав дакьин дуваву тIалав дуллай, амма, дакьин дувансса махъгу буллай, зат къадуллай сайки дачIи шин ларгун дур.

СалихIалгу Ясамальский райондалул хъуниминнайн аьрза чивчуну бур. «Ттун тIааьн бизансса иш хьуна, Ясамальский муниципалитетрал зузалал ттула дарвазалийн кьутI учайхту, аьрзирай ттулла телефон чичин хъамабивтун бия, сотрудникнангу ккаккан дурсса адресрай учIан багьну бия. Ванал, ттул номергу чивчуну, бувсуна ччясса мутталий гьав дакьин дувантIишиву. Мукун бугу-бувна. Фаик Закиевлул кулпатрал ва ванал коллегахъал-журналистътурал чулуха барчаллагь тIий бура Ясамальский муниципалитетрал хъуниминнахь. Ва иширалгу чIалачIи бунни хIукуматрал журналистътурацIун бавхIусса масъаларттах къулагъас дуллалишиву», – тIий бур СалихIа.

Жува цинявгу барчаллагьрай буру ванийн, Дагъус­ттаннал ва Азирбижаннал язисса арс Фаик Закиевлул гьав лайкьсса даражалийн дуцин хъирив був­ккун, хIарачат баврихлу. Бусанну СалихIа цуппагу чIярусса шиннардий зий бушиву Азирбижаннал Телеграф агентствалий (АзерТАдж) ва лайкь хьуну бушиву Азирбижаннал Президентнал чулухасса «Тарагги» («Прогресс») медальданун. Бакуйннал агьулданул ва коллегахъал-журналистътурал дянив СалихIа сий дуну, хIурматрай бушиву жу СМИ-дайгу, социал сетирдайгу буккару, кIулли ва Фаик Закиевлул чичрурду дунияллийн дуккан дувансса ниятрайгу бушиву. Дуван дакIнийсса давуртту бартдигьин ванихьхьун цIуллушиву дулуннав!

­