Мудангу гъирарай вичIи дишару оьрму-хIал лавгсса жула бавахъал бусласимуних. МахIаттал-хIайран хьунсса бур вайннал оьрмулул ва захIматрал ххуллу. Хъу-лухччинул, колхозрал давурттай захIматгу буллай, ичIува чIявусса оьрчIругу хъуни бувну, къатта-къушгу бурувччуну, яхI кьацIул бувгьуну оьрмурду бувтун бур вайннал. Циксса ккаккарчангу, цала аьчухшиву, дугъришиву, узданшиву яхьуну дур вайннаву бусса оьрмулий.
Мукунминнавасса бур Хъусращиял шяравасса Оьмардул ва Нукьил душ Шяпилова Башарат. ЦIана Башаратлун 94 шин дур. Ва ялапар хъанай бур ЦIуминалийсса Чапаево шяраву. Оьрмулул шиннардих, бувсса захIматрах къабурувгун, хъярч-махсарттугу буллай, гъирарай буслай бур цинма ккавкцириннуя.
– На 6-мур классраву дуклакисса чIумал байбивхьуна Хъун дяъви. Мюрщи-хъуни къаувкуну, цинявппа чиваркI дяъвилийн буцлацисса чIун дия. Жул классрава бачIи къанавртту дуклан бувцуна, бачIи дояркахъулну гьан бувна. Нагу дояркану лавгра. Ттул бикIайссия 11-12 ттизайсса оьл. Цуксса жунма захIматнугу, бувчIлай бия тай дяъвилул шиннардий жуйра дирхьусса хъар лахъан аьркиншиву. Лаххи-ликкиялул щаллуну къабикIайвав, бяхълай, ризкьилун лазуни дирчусса тIулунттавун бувххун шанан бикIайссияв. Ци чулийгу жула даву лажин кIялану дан хIарачат байссия, – тIий бур Башарат.
Башаратлул лас ХIажимуси ивкIун ур Хъусрал ЧIаратусса. Ва дяъвилий усса чIумал бизан бувну бур Хъусрал ЧIар ЦIуссаминалийн. ХIажимуси гьуртту хьуну ур финнащалсса дяъвилийгу. Мунияр махъ ванал бивтун бур Буттал КIанттул цIанийсса Хъун дяъвилул лахъисса ххуллу. Вагу хIала ивкIун ур Берлиннай ттугъ бишлашиминнавух.
Башаратлул лас ХIажимуси ивкIун ур Хъусрал ЧIаратусса. Ва дяъвилий усса чIумал бизан бувну бур Хъусрал ЧIар ЦIуссаминалийн. Шанна шинай ХIажимуси ивкIун ур аьралуннаву къуллугъ буллай. Шавай увкIун хъунма хIал къавхьуну, дяъви байбивхьуну, увцуну ур дяъвилийн. Ва гьуртту хьуну ур финнащалсса дяъвилийгу. Мунияр махъ ванал бивтун бур Буттал КIанттул цIанийсса Хъун дяъвилул лахъисса ххуллу.
Вагу хIала ивкIун ур Берлиннай ттугъ бишлашиминнавух. Кулпатрал кьадрулий ядуллай бур ванал дяъвилий лайкь дурсса наградартту. Миннувух дур кIира Славалул орден ва чIярусса медальлу. ОьрчIал оьрчIру хIакьинугу пахрулий бачай дяъвилий гьуртту хьусса ттаттал суратращал БивкIу бакъасса полкравух.
ЗахIматсса щавурду дирну, дачIи шин госпитальданийгу дурну, буттал шяравун зана хьусса ХIажимусин, бизан бувссар тIий, шяраву цучIав къалявкъуну ур. Баллай бивкIун бур ЦIуминалийн бизан бувминнал оьрмугу бигьасса бакъар тIий, мунияту дустурал ХIажимуси шиккува ацIан увну ур.
Ва ивкIун ур строитель, даврил сант кIулсса, кару мусилсса адамина. ЧIявусса чиваркI дяъвилия зана къавхьуну, давуртту щарчусса чIумал, шяраву колхозрал давурттай зунсса инсантал аьркинну буну, ва чIумал шяравун увкIсса ХIажимуси хъинну учIи лявкъуну ур. Ва ивтун ур Хъусращиял фермалий бригадирну.
Ва ппурттуву кIул хьуну ур дояркану зузисса Башаратлущал. Башаратлун та чIумал 18 шин диркIун дур. Ва цуппагу хъинну сий дусса, зирангсса, дан-дитан кIулсса, ябацIансса душ бивкIун бур. Башаратгу бувцуну, Хъусрахь ххаллилсса къатригу дурну, ялапар хъанан бивкIун бур. Шикку увну ур вайннал хъунама арс Лагьбар. ХIажимуси Хъусрахь усса бавну, гъан-маччами цачIанма оьвтIун бивкIун бур. Му диркIун дур ЦIуминалий оьрму нирхиравун багьлагьисса чIун. Агьулдания ятну къаикIан ХIажимусингу цаламинначIан изан ччан бивкIун бур.
Укун, 10 шин Хъусрахьгу дурну, вайннал кулпат бивзун бур ЦIуссалакрал райондалийн Чапаево шяравун. Шийхгу вайннал дянив мукьва оьрчI хьуну бур. Дяъвилул мушакъат увсса ХIажимуси ччяни дунияллия лавгун ур. ЧIина-чIивима арс Муса увну кьулкусса кьини дунияллия лавгун ур вайннал ппу. Хъунама арс Лагьбардун ва чIумал дахьра мяйра шин диркIун дур.
Ххюва мюрщисса оьрчI ца канихун багьсса Башаратлун кIилийнусса хъар лахълан багьну бур. ЦIусса миналийгу ванин ххюва оьрчI бакI буккан бан къабигьану бивкIун бур.
– Оьрмулул 12 шинаву байбивхьуссар ттул захIматрал ххуллу. Колхозрайгу зий, хъуру дугьлай, гектардайсса аьрщарай кказа буллай, школалий уборщицанугу зий, жандалуцIа хьуннин захIмат буллай лавгссар ттул оьрму. Зий аьдатсса на, оьрчIругу бацIан къабитайссия, ттун вайгу захIмат ххирану тарбия хьуну ччай бия…, – тIий бур Башарат.
– Оьрмулул 12 шинаву байбивхьуссар ттул захIматрал ххуллу. Колхозрайгу зий, хъуру дугьлай, гектардайсса аьрщарай кказа буллай, школалий уборщицанугу зий, жандалуцIа хьуннин захIмат буллай лавгссар ттул оьрму. Зий аьдатсса на, оьрчIругу бацIан къабитайссия, ттун вайгу захIмат ххирану тарбия хьуну ччай бия. Наксса захIмат бувсса инсан Хъусращиял шяраву акъахьунссар. ЗахIматрал инсан ивчIайсса ивкIссания, на дирчIанссияв, – тIий бур Башарат.
– Жул ниттин зукъазисса инсан душманни. ЦIанагу дуссар, дайгьин къахъанай, ттущал багъ биххан дуклай. Чув-бухьурчангу, жу зий бикIан аьркинссару. Ва цурдагу гьар кIанай, оьрмулувугу, давривугу, хьхьичIунну диркIун дур. Ва хъинну бакIрал ххуйсса, сий дусса хъамитайпа бивкIун бур. На Буйнакскалий дуклакисса чIумал ччя-ччяни лагайссияв жула шяравучу Ибрагьинхъаннийн. Ва, жул «сий ду чит» цукун бур тIий, мудангу бавая цIухлан икIайва. Зул бава шяраву яла бакIрал ххуймур, ххаллилмур, цIу-цIанпир бумур душ бикIайссия тIун икIайва, – дакIнийн бутлай бур Башаратлул душ ТIагьират.
Башарат бур захIматрал ветеран. ЗахIматрал ххуллий ванил лайкь дурну дур 100-нния лирчусса медальлу ва цаймигу наградартту.
Башарат бур захIматрал ветеран. ЗахIматрал ххуллий ванил лайкь дурну дур 100-нния лирчусса медальлу ва цаймигу наградартту.
ЦIана Башарат оьрчIалгу, оьрчIал оьрчIалгу, вив лавсун, хъихъи бивтун ябуллай бур.
Жагьилний кунма къудурсса, цIу бусса ихтилатру, хъярч-махсартту буллалисса Башаратлух вичIи дишин цIанагу бучIай лагма-ялттуми, чIаххув-чIарахми. Аьдат хьусса куццуй, цичIана увкIсса цаягу инсан хъамалу къаувну къаитаакьай ванилгу.
Имара Саидова
Андриана Аьбдуллаева
