Кулпатрал кьинилун хасну

Кулпатрал, ччаврил ва дакI тIайлашиврул байрандалул хьхьичI гьантрай Каспийскалийсса Социал центрданий шадлугъ хьунни. Ва щаллагу Аьрасатнаву кIицI лагайсса цIусса байран, махъсса кIира шинай, къадурну диркIун дур ковид сававсса къадагъа духьувкун. Вана утти Центрданул, аякьалийн лавсминнайн оьвкунни «Россия Plaza» ресторандалувун. Оьвкуну бия ташу бувну 30, 40, 50 ва ххишаласса шинну хьусса 15 кулпатрайн.

Центрданул директорнал хъиривчу ХIажи Загьидовлул вай барча буллай, кIицI лавгунни цIакьсса ташурду жагьилминнангу эбратрансса хъанахъишиву. БавтIцири барча буллалисса ихтилатру бунни Каспийскаллал шагьрулул депутатътурал мажлисрал хъунама АьбдулвахIид Жаватовлул, ванал хъиривчу Аза Аьлиевал, «Крик ТВ» федерал телеканалданул корпунктрал директор МахIаммад КьурамахIаммадовлул.

Хъамаллуран ххуйсса культуралул программагу хIадур дурну дия, ххуйсса бахшишру дуллунугу ххари бувна. Центрданул коллектив барчаллагьрай бур ва мероприятие дуван кумагру бувцириннайн.