Июньдалул 12-нний Хасавюртуллал райондалий байбивхьунни ссуттил хъуру ттихIлай. Муния бувсунни ДР-лул Шяраваллил хозяйствалул ва бакIлахъиялул министерствалул. ХIаллил лакьаврил давуртту ххал дигьин Ждановлул цIанийсса СПК-лийн лвгунни республикалул шяраваллил хозяйствалул ва бакIлахъиялул министрнал цалчинма хъиривчу Шарип Шарипов.

Хозяйствалул каялувчи ХIажи Бадруттиновлул тIимунийну, ца гектардания 20 центнер къалмул ласунсса ният дур, шикку аьрщи щин дишайсса дакъа тIий ва оьргъушивугу чансса дуну тIий.
Шарип Шарипов ивунни мукуна «Османюртовский» МУП-райнгу, тикку ца гектардания ласунтIий дур 50-60 центнер ссуттил лачIал.
Министрнал цалчинма хъиривчунал бусаврийну, Шяраваллил хозяйствалул министерствалул хъузалтран бюхъайсса кумаг буллай бур хIаллил лакьаврил давуртту ччясса мутталий бартдигьин.

Республикалий хIаллил лакьин аьркинну дур 93 азарда гектар ссутнил лачIал, миннувату16,7 азарда гектар – Хасавюртуллал райондалий. Ми давурттавух гьуртту хьунтIий бур 450 комбайн. ДукIу республикалул хозяйстварттал ларсун дур хьхьичIмур шиналнияр 55% техникалул ххишаласса.
Шарип Шариповлул тIимунийн бувну, хозяйстварттан министерствалул кумаг буллантIий бур хIаллил лакьавриву захIматсса масъалартту чулийн буккан буллан, цила чIумал ва аьркинссаксса лазуни хIадур дуллан.