Республикалий туризм тIутIайх дичаврия заралливкьай ягу барачатшивурив тIисса, дагъусттанлувтурал дянивсса цIухху-бусу.

ЧIяруми жавабру дур укун­сса мяъна-мурадрал:
– Гьаксса ххуйри, рязиру, агана миннал зана-кьулушинна, жу шиккун бувкIссару жулла арцух, жунна ччимур дулланшиврул, тIисса дакъахьурча.
– Туризм тIутIайх дичаврия рязиссару, цанчирча жулла республикалул цIа бусрав хъанай, сий лахъ хъанай дуну тIий. Агьалинан зузи кIанттурдугу хъанай, маэшат къулай хъанай буну тIий. МуницIунма къарязиссару, жула машачитурал, миннайн ишан ларсун, дуки-хIачIиялул багьри лахъ буллалаврия.
– Гьантлия гьантлийн жу­чIанма нанисса туристътал сававну лаякъатрал багьри хъиннува гьаз хъанахъаврий къарязиссару.
Шиккува гъира багьуна ца цамургу цIурувкьюсса суалданун жавабру цукунсса дулайрив ххал бан.

– Зул пикрилий, жучIанма бувкIсса туристътуралгу аьркинссарив жула аьдатирттах ва багьу-бизулух бурувгун къуццу буллан?
Жаваб дулун яла чялиш бувк­миннавух жагьилтал бия:
– Гьай-гьайкьай, Дагъусттаннай хъамаличунал хIурмат лахъссар! Амма хъамаличунан цува усса кIанугу хъамабивтун, хху­ттава уклан къабучIихьунссар.
– Туристътал бур цалла арцух бигьалаган бувкIсса халкь. КIанттул агьулданул тIалав­шиннарду кьаралданий­сса ва ссавурданийсса дикIан аьркинссар.

ЧIалачIиссаксса, жавабир­ттава бувчIлай бур, турисътурал ва кIанттул халкьуннал дянив бувчIу-къабувчIурду къа­хъананшиврул, цивппа бигьалаган нанисса кIанттурдай, багьу-бизугу хIисавравун лавсун, къу­ццу буллан аьркиншиву. Дагъус­ттан, мяйжаннугу, хъамал ххирасса, вайннал ци хIурмат бан, цукун рязи бан хъинавав тIисса кIанур. Шикку мудангу ялугьлай буссар хъамаллурах!
ХIасил, хIакьсса туризм – му барачатшивур.

  Ася ХIусайнова, журналистикалул 3-мур курсрал студентка.
Таржума бувссар Залму АьбдурахIмановал