«Ниттил мазрай балай учинсса талихI хьунни»

Уттигъанну Самаралий хьунни «Аьрасатнал студентътурал инт» тIисса билаятрал вузирдавасса 5 азараксса студент гьурттусса фестиваль.  Дагъусттанная ваний гьуртту хьуну бур Аьлиева Наида. Ванил «Халкьуннал балай» тIисса номинациялий даргиял мазрайсса балай щаллу бувну, бувгьуну бур 2-мур кIану. Хъун бакъасса цIухху-бусулуву, хъирив лаянну Наидал творчествалул ххуллул.


– Наидай, балай тIий та байбивхьуссара ина? Ци савав хьур му магьирлугъ дакIнил язи дугьан?
– Балай тIун гъира багьуна чIивинияцIава. Хъинну ххирая оьрчIний жула эстрадалул балайчитурах вичIи дихьлан. Школалий 9-11-ми классирдаву дуклакийни, чIунархIал душваврал хьхьичI сивсуну балай тIийни, гай бикIайва дакI дуллай: «Гьаксса ххуйну хъанай бур, байбихьу нач къадурну балайрду щаллу буллай», – тIий. Та чIумалва лавгун бувхра музыкалул школалийн ва хордануву байбивхьура балай тIий. ХIасил, бувчIуна балайлул ххуллийх ттунма бачин ччишиву.

– Творчествалул цалчинми шаттирду ссая байбивхьуссия?
– Дайдихьу хьуссар буттал шяравура. 7-8 шин хьусса чIумала байбивхьуссара Сергокъалаллал райондалул вокалданул конкурсирттай гьуртту хъанай, яла республикалул  даражалийсса конкурсирттайн буклай. ДГУ-равун дуклан бувххун махъ тIурча, байбивхьура сивсуну вузрал ва МахIачкъалаллал администрациялул мероприятиярдай гьуртту хъанай.

– Уттигъанну Самаралий хьусса «Аьрасатнал студентътурал инт» тIисса фестивальдания ина зана хьунна хьхьичIунсса кIанугу бувгьуну. Ци асарду бия сахIналийн буккан хьхьичI?
– Хъинну гьанавиххину, си­къасавай бивкIра. Нава кунмасса гьурттучитурал, жулсса буллалисса каялувчитурал ва волонтертурал кумаграйну, нигь-ццахгу лавгун, сахIналий бавцIуний, цимур-ца къадиркIсса кунна, бигьа-рахIатну балайгу щаллу бувну лавгра. ЧIу зурзу тIий, ттула нава бугьан къахъанахъисса ца лахIзагу хьуна, ялагу кьянкьа дурну, шаймур бувссия ттуйва бивхьусса бурж биттур буван.

– Ци номинациярттай гьуртту хьуссияв ина?
– На бувгьуссияв 2-мур кIану «Халкьуннал балай» тIисса номинациялий даргиял мазрай «Рашидат» тIисса балай щаллу бувну. Мукунма 2-мур кIану бувгьуссия «Попурри» щаллу дурну «Малая форма» тIисса номинациялий. СахIнагу хъинну дакI дакьинсса бия, тамашачиталгу барчаллагьрай, хъунмасса хIаллай хъатру ришлай бия. Нава гьуртту шаврия рязину ливчIра.

– Ниттил мазрайсса балай щаллу бан цан пикри хьуна?
– Ттула каялувчинащал пикри бувссия ва балай учин. Ниттил мазрайсса балайращал буккан ччай бия Самаралийсса сахIналийн, нава кунмасса, личIи-личIисса регионнаясса жагьилтурал хьхьичI ниттил маз, дагъусттаннал маз лахъа-хъун бан.
– Цукун кьамул бувна тамашачитурал «Рашидат» тIисса балай?
– Жюрилун ва тамашачитуран ххуй дирзсса ххай бура на ларххун бивкIсса халкьуннал янна-ус. Балайлул хIакъираву тIурча, къакIулли. Ци бувчIухьунссар вайннан маз къакIулсса ттул балайлува, амма хъатру гужсса дия.
– Вил репертуардануву буссарив винма ххира­сса, дакI дакьайсса, инава бизар къашайсса балайрду?
– Буссаркьай. Хъинну ххирар дунияллийх цIа дурксса Diamonds-Rihanna балайрду щаллу буллан. Цимил сахIналийн бу­ккарчангу, вайннал балайрдащал, дакIнивун ца илгьан къабагьну къаличIай.

– Кулпатраву цукун кьамул бувай вил балайрдал чулухунмайсса гъира-шавкь?
– Гьакссагу ххуйну кьамул бувай. Ттул нину-ппугу балайрдах, макьаннах гъира бусса бур.

– Вила пикрилий, ци чанну дур жулла республикалий жагьилсса, дахьва байбихьлахьисса  балайчитуран?
Чанну дур чIарахбацIаву. Творчествалул инсантуран чара бакъа аьркинссар конкурсру, магьирлугъраву зат бувчIайсса пишакартурал насихIатру бусласисса батIавуртту. Ттун ттунма талихI хьуссар, музыкалия зат кIулсса, ттул чIунил ялув захIмат бихьлахьисса Аминат Кьурбанова ва Марат ЦIургулов бакIрайн багьаву. Барчаллагьрай бикIара на вайннайн, цанчирча гихунмайсса хияллавугу ттун ттула оьрму балайлущал бахIин ччай буну тIий.

 Ася ХIусайнова, журналистикалул
3-мур курсрал студентка