ХIажлийнсса 33 авиарейс

Дагъусттаннал таможенниктурал хIажлийнсса 33 авиарейсрал оформление дувансса ният дур гьашину. Аьмну МахIачкъалалия хIажлийн леххан ччиминнал аьдад 6000-нниха ливчусса дур.


– Июнь зурул 28-мур кьининийн таможенниктурал 12 рейс оформит дурну дур. Сайки 2000 пассажир хъанай ур. Махъра -махъмур рейс дувантIиссар июль зурул 3-нний, жу циняр тIалавшиннарду дурурччуну закондалул кьаралданий зий буссару, пассажиртурал багажрацIун ягу документирттал оформленияцIун дархIусса диялдакъашивуртту ялун къалирчунни», – тIий ур Дагъус­ттаннал таможнялул хъунама Сергей Троцко.

ХIажлил чIун гъан хьун хьхьичI таможнялул даву сантирай хьуншиврул дуван аьркинсса давуртту дурну дур. Масалдаран, июнь зурул дянивсса гьантрай, агьали хIажлийн ххилаххаврилсса буллалисса «Марва-турданул» ва Дагъусттаннал Миллатирттал политикалул ва динийсса иширттал­сса буллалисса министерствалул вакилтуращал хьунабавкьуну бур таможнялул зузалт.

Мукунма МахIачкъалаллал аэропортрай таможнялул зузалтрал ва ялувбацIаву дуллалисса паччахIлугърал структурардал ххал бивгьуну бур хIажлицIун бавхIусса агьамсса масъалартту. ХIажлийн наними биян буллалисса, буцлацисса ппурттуву таможнялий дежурствалул давурттугу сантирайн руртун дуссар, даврил опыт бусса зузалт ялувбацIаву дуллай буссар.

Зоя Амирханова, Дагъусттаннал таможнялул пресс-секретарь