Тяхъану ва шадну кIицI ларгунни Аьрасатнал шагьрурдай Жагьилтурал кьини. Хъуннасса байран ва кьини сакин дурну дия МахIачкъалаливгу. Жагьилтурал кьинилун хасъсса фестивальданувух гьурттушинна дурну дур 15 азараксса дагъусттанчувнал. Фестиваллу най диркIссар Дагъусттаннал хъуншагьругу хIисавну, Аьрасатнал 10 шагьрулий.
МахIачкъалаллал кучардай щурущи бувсса жагьилтурал майданнай дакъасса журалул тяхъашивуртту, мастер-классру ва ярмукIартту дакъая. Вай бачин бувну бия жула шиччасса бакъасса, билаятрал цайми шагьрурдая бучIан бувсса экспертъталгу. Циняр батIавуртту дия гьурттучитуран асар хьунсса ва личIи-личIисса кIулшивуртту дуллалисса. Жагьилтуран яла дакI даркьумур лахIзагу бия вайннан хIадур дурсса концертрай цанма ххирасса балайчитал, уттизаманнул артистътал, Bahh Tee ва Turken, гьуртту шаву.
Хъуншагьрулий дакъасса, жагьилтурансса шадлугъру хьунни Дагъусттаннал районнайгу. Жагьилтурал кьинилул лагрулий Лакрал райондалул бакIчи хьунаавкьунни шиккусса жагьилтуращал. Ванал ляличIисса къулагъасралун лавсунни цIана Украиннаву нанисса аьрали иширттавух гьурттусса жагьилталгу. Барчаллагьрал чагъардугу тапшур бувну, бакIчинал чIа увкунни вайннан цIуллушиву ва лахъисса оьрмурду.
Жагьилтуращалсса хьунабакьаву къуртал дурунни ххуйсса концертрайну ва къавтIавурттал мажлисрайну.
Ася ХIусайнова, журналистикалул
3-мур курсрал студентка
