Июнь зурул 28-нний МахIачкъалалив Тарихрал музейраву хьунни «Я – дочь Дагестана, Великой России» тIисса Фазу Аьлиевал 90 шин шаврил юбилейрацIун дархIусса Республикалул Зунттал хъаннил съезд.

Ва сакин дурну дия Да­гъусттаннал Хъаннил союзрал ва Миллатирттал политикалул ва диндалул иширттал министерствалул чIарав бацIаврийну.
Съездрал даву дайдирхьунни авадансса концертрал программалийну, ниттил мазурдийсса шеърирду буккаврийну ва Да­гъусттаннал халкьуннал поэтесса Фазу Аьлиеван хас дурсса «Дагестан» ГТРК-лул ларсъсса кино ккаккан даврийну.

Шикку гьуртту хьунни ДР-лул Миллатирттал политикалул ва диндалул иширттал министр Энрик Муслимов, ДР-лул Жагьилтурал иширттал министр Камил Саидов, КIулшивуртту дулаврил ва элмулул комитетрал председатель Елена Павлюченко, Дагъусттаннал Хъаннил союзрал председатель Интизар Мамутаева, Дагъусттаннал Кадрардал центрданул каялувчи Такибат МахIмудова, «Дагестанский аул» этнографиялул комплекс музей-заповедникрал директор Зумруд Сулайманова, Дагъусттаннал муфтийнал жяматращалсса ва СМИ-рдащалсса дахIавурттал масъаларттал маслихIатчи Аьйна ХIамзатова ва Дагъусттаннал хъаннил союзирттал председательтал.

Республикалул БакIчи Сергей Меликовлул чулуха съездрал гьурттучитал барча буллалисса ихтилат бунни Энрик Муслимовлул.
– Хъунмасса барчаллагьрай ура ниттихъал, душваврал, ссурваврал хьхьичI ихтилат бан ттуйнна вихшала даврия. Жун лайкьсса тарбиялул гьану бизаву хьхьичIва-хьхьичI зуяр хъар хъанахъисса. Зу оьрчIру тарбия буллай бивхьусса захIматрал чIалачIи дур­сса хIасиллая хIакьину пахрулий буссар щалагу Дагъусттан, – увкунни Энрик Муслимовлул.
Министрнал личIинува кIицI лавгунни ва барчаллагь увкунни республика хьхьичIуннай давриву хъунмасса бутIа бивхьусса, бусалдаравун багьсса хъаннихь – Такибат МахIмудовахь, Зумруд Сулаймановахь ва Аьйна ХIамзатовахь. Мукунма, барчаллагь увкунни ххаллилсса батIаву сакин дан сиптачи хьусса Интизар Мамутаевахь.
Ихтилат къуртал буллай Энрик Муслимовлул Интизар Мамутаеван тапшур бунни, Аьрасатнал Федерациялул Обороналул управлениялул миллатирттал центрданул хъунама, генерал-полковник Михаил Мизинцевлул чулухасса барчаллагьрал чагъар.

Камил Саидовлул кIицI лавгунни кулпатирттавусса ва жяматравусса хъаннил бияла хъунмасса бушиву.
– ЦIанасса ппурттуву чIявусса затру хъар хъанай бур жагьилтурая. Жагьилтал тарбия бавугу ниттихъайн багьлай бур. Республикалул бучIантIимургу жагьилтурая хъар хъанай бур. Зу, хъунмасса захIмат бихьлай буру ялун нанисса ник бутта­хъал иср буручлай тарбия буллай, – увкунни Камил Саидовлул.
Аьрасатнал Хъаннил союзрал председатель Екатерина Лаховал видео-барча бавриву кIицI лавгунни, зунттал хъаннил Аьрасатнал аьралитурал чIарав бацIаву мурадрай дур­сса давуртту.
– Зу дурсса ххаллилсса давурттая бавссар республикалул кьатIувгу. Аьрасатнал Хъаннил союзрал бюхттулсса кьимат бивщуссар Донецкаллал ва Луганскаллал халкьуннал республикартту дуручлачисса дяъвилул операциялуву гьуртту хьусса жула аьралитуран зу бувсса кумагирттан. Зул посылкарттал ва чивчусса чагъардал ххари бувссар цикссагу аьралитал, – увкунни Хъаннил Союзрал председательнал.

Съездрай агьаммур доклад бунни Дагъусттаннал Хъаннил союзрал председатель Интизар Мамутаевал. Ванил балжийну бувсунни Хъаннил союзрал бакIщаращуй бивкIсса Фазу Аьлиевал дурсса ххаллилсса давурттая. Мукунма, дакIнийн бивчунни республикалул цикссагу ххаллилсса хъами цачIун бан сиптачину бувксса, бусалдаравун багьсса Фазу Аьлиевал бувсса захIматирттая.

БатIаврий гьуртту хьунни Дагъусттаннал халкьуннал артист, Аьрасатнал лайкь хьу­сса артист ТIагьир Курачев, ПаччахIлугърал академический ансмабль «Лезгинка», Дагъус­ттаннал халкьуннал артист Аьбдулла МахIаммадмирзаев ва ц.
Мероприятие къуртал хьунни съездрал гьурттучитурал – Илизаровлул цIанийсса Дарбантуллал медколледжрал душваврал Хъаннил союзрал председатель, «Worldskills» региондалул чемпионатрай ххув хьусса, колледжрал волейболданул цачIун дур командалул капитан Зарина Аьлиевал обращениялийну.