Дагъусттаннал БакIчи Сергей Меликовлул сипталийн бувну, Республикалул Халкьуннал Мажлисравун ларсун дуссия ДР-лул Конституциялувун дахханашиннарду дуллалисса законопроект. Мунил хIакъиравусса бувчIин бавуртту дунни ДР-лул Халкьуннал Мажлисрал председательнал хъиривчу Камил Давдиевлул.
Давдиевлул кIицI лавгунни, ДР-лул Конституциялувунсса дахханашиннарду даву, республикалул законодательство Федерал законнал кьануннайн дуцаву хъанахъишиву.
«ДакIнийн бутанну, 2021-ку шинал декабрь зурул 21-нний кьамул дурну диркIшиву «Об общих принципах организации публичной власти в субъектах Российской Федерации» тIисса № 414-ФЗ. Ва закон кьамул дурну диркIссар билаятрал дурсса Конституциялувунсса дахханашиннарду хIисавравун ларсун.
ЦIанакул тIурча жува кIира шинал хьхьичI агьалинал чIурду буллуну, кьамул дурну диркIсса дахханашиннарду закондалул кьануннайн дуцлациссару. Билаятрал цинярдагу субъектирдай ххал дигьлай буссар Конституциялуву дуллалисса дахханашивуртту. БувчIин бан ччай ура «Территория Республики Дагестан едина, ее границы не могут быть изменены без волеизъявления многонационального народа Республики Дагестан» тIисса ДР-лул Конституциялул 57-мур статьялуву цукунчIавсса дахханашивуртту къахъанахъишиву.
Вай цивппагу цинявннал цачIуну ххал бигьин аьркинсса масъалартту хъанахъиссар. Конституциялуву дуллалисса дахханашиву ххал дигьинтIиссар ДР-лул Халкьуннал Мажлисрал заседаниялул цалчинмур бутIуву. ДР-лул Халкьуннал Мажлисрал заседаниялул кIилчинмур бутIуву дахханашиннардащалсса законопроект кьамул дантIиссар элмийсса ва академический сообществалул ххал диргьуну махъ.
