Ларгсса итникьини, Дагъусттаннал БакIчи Сергей Меликовлул, республикалий экономика хьхьичIуннай нани давриха зузисса Оперштабрал заседаниялий муниципалитетирттал хъуниминная тIалав бунни, социал объектру лахъи лаган къабуллай, чIумуй къуртал бан.
– Школарттал капремонт чIумуй къуртал дурну дикIан аьркинссар, давугу чярхний, ччи-ччикун къадуллай, лавайсса даражалийсса дикIан аьркинссар. Агьали ялугьлай бур садикирттах, школарттах, даву лахъи лагарча, ми хъирив шиналнин личIлай бур. Укунсса иш къабикIан аьркинссар, – увкунни республикалул хъунаманал.
Дуккаврил элмулул министр ЯхIия Бучаевлул бувсмунийн бувну, хIакьинусса кьини дуккаврил идарарттал капремонт дуван, 199 контракт цIакь дурну дур, 109 объектрайсса даву сантирай най дур, 90 объектрай махънийн дагьну дур.
ХIукуматрал хъунаманал цалчинма хъиривчу Руслан Аьлиевлул балжийну бувсунни, республикалул экономика гьаз даву ва предпринимательтурацIун кабакьаву мурадрай, цуку-цукунсса давуртту хьхьичI ххуттайн ларсун дуссарив.
Вице-премьернал бувсунни, шяраваллил кIанттай къатри дуван ягу машан ласун дагъусттанлувтуран ипотекалул кредит ласунсса сант душиву ва хасну ва иширан Аьрасатнал хIукуматрал луртандалул фондрава 7 миллиард ккаккан бувшиву кредит лагьсса процентрай ( 3 % ) ласуншиврул. Бувсунни Дагъусттаннан личIи бувшиву «Астрахань-Кочубей-Къизляр- МахIачкъала» шагьраххуллу буван 215 31 миллиард.
