ЦIуссалакрал райондалийсса школарттай гьануцIакулсса ремонтру даврил тагьар ссайн дирну дурив ххал диргьунни ДР-лул Халкьуннал Мажлисрал законодательствалул, закондалул, паччахIлугърал строительствалул, кIанттул цила каялувшиндарал ва регламентрал комитетрал председатель Артур Исрапиловлул, ЦIуссалакрал райондалул БакIчи МахIаммад-ХIажи Айдиевлул, Архитектуралул ва градостроительствалул отделданул хъунама Цаххи Базановлул.

Цалчин вайннал ххал бивгьунни ЦIуминалийсса Шушиннал школа. Шикку хъамаллурал делегация хьунабавкьунни подрядный давуртту дуллалисса идарарттал вакилтуращал ва школалул каялувчитурщал.

Му бакъассагу, ххал диргьунни проектно-сметный документация, строительствалул давуртту цукун най дуссарив ва школалул лагма-ялттусса кIанттурдай хIасул дурсса шартIру.
Шиккува кIицI лаган, «Единая Россия» партиялул сипталийнусса 2022-ку шиналсса кIулшивуртту дулаврил идарарттай гьануцIакулсса ремонтру даврил федерал программалул лагрулий ЦIуссалакрал райондалийсса Шушиннал, Банайюртуллал школарттай ва Чапаевкаллал 2-мур школалий дуллай буссар ремонтирттал ва строительствалул давуртту.

КIицI лавгсса шанмагу школалий баян бувну буссия конкурс, дурну дуссия шикку ремонтирттал давуртту дуллансса подрядный идарарттащалсса кьутIирду. ЦIанасса ппурттуву вай шанмагу школарттай дуллай буссар гьануцIакулсса ремонтру, бакьин бунни спортзаллу, цIудуккан дунни магъурду.

Даврил тагьар ххал дигьин бувкIсса делегациялул кIицI лавгунни, школарттайсса ремонтрал давуртту графикрайн бувну дачин дурну бушиву. Подрядный идарарттал зузалтрая тIалав бунни контрактрай ккаккан дурсса чIумуйн бияннин ремонтрал давуртту къуртал дуван.