Гъумук тIивтIунни хъамаллурансса къатта

Гъумук тIивтIунни хъамаллурансса къатта

Вай гьантрай Гъумук хьунни хъамал ликкавансса цалчинсса этно- къатта тIитIлатIисса шадлугъ.

АцIния ххюя инсан лагайсса хъамал ликкай къатта тIивтIунни Гъумучиял шяравалугу хъатлий дирхьуну чIалачIисса, мунил лагмасса зунттал тIабиаьтрай зиярат бан бюхъайсса кIанттай дирхьусса Ансар Къажлаевлул къатраву. Шичча ца эмаратну чIалай бур ВацIилу зунтту, муниха буклакисса зунзулчаннал чанна лахъан бувсса БурхIай къала – ва сурат цал ккавкма, цIунилгу кIункIу уллантIиссар шиккун. Шичча хъамакъабитулун даван хьунтIиссар яргсса суратру.
КIицI къабувну къабучIир, дакI сахаватлувсса Ансар Къажлаевлул ужагърал къапу муданма тIивтIунма буссар хъамаллуран, тIивтIунма буссар ссупра. Райондалийсса мероприятиялийн бувкIсса хъамал хьуннав, Гъумучи шагьрулул цIа ларсун бувкIсса хъамал хьуннав чIявуми Ансардулъя хъамалу буцайсса. Ца ххирассарча цанмагу гъинтнил хьхьурдай цIурттал чанна лархъсса ссавнилу ссупрагу тIивтIуну, лакку цIиннарай дирзсса самовардануву лакку билаятрай ххярхсса уртту- тIутIал чяй дуллан, гъирарай Гъумучиял цIанихсса тарихраягу буслай.
Хъамал ххирахьурчагу, ми ужагърай гьарца кьини тIисса кунма, чан къашайсса бухьурчагу, хъамал ликкай къатта тIитIинсса пикри Ансардул бувагу къабагьайссия, ссавнилусса музей хьусса къатрай ва шиччату ябацIайсса кIанттурдал хIайран бувсса хъамаллурал дакIнийн къабувтссания.
Этно-къатта хъамаллуран ккаккан буллай, Ансар Къажлаевлул бувсунни Гьумучиял тарихрая, лагма чIалачIисса эмаратсса кIанттурдая, тарихрал гьайкаллая.
Гъумук хъамаллураща ккаккан бюхъан тIий бур 778 шиналва бувсса Хъун-Мизит, щайх Жамалуттиннул къатта, зияратру, гьайкаллу, ччимур чIумал эмаратсса Ханнал-Бяр, Совет Союзрал Виричу, летчик-космонавт Муса Маннаровлун цIа куну дурсса ракета.
Райондалул бакIчи Юсуп МахIаммадовлул бувсунни Гъумук тIитIин пикри бушиву уттигу кIива хъамал лахъай къатта. Мукунмасса къатри тIитIин ччисса бушиву цайми щархъавугу.

Читайте также: