Июнь зурул зувинний хьусса Дагъусттаннал Халкьуннал Мажлисрал 13-мур сессиялий республикалул хъунама Сергей Меликовлул парламентрал шинайсса даврил хIасиллу дунни.
П. Рамазанова
– Ва чIумул мутталий 13 сессия хьуссар, Дагъусттаннал БакIчи увчIуссар, шанна шинайсса бюджет кьамул бувссар, Дагъусттаннал БакIчинал республикалул хIукуматрал даврил хIакъиравусса отчетрах вичIи дирхьуссар, 84 законопроект ххал диргьуссар, 46 закон кьамул дурссар. Халкьуннал Мажлисрал захIматсса тагьарданувун багьсса предпринимательтуран ва агьалинан къулайсса 34 постановление цIакь бувссар, – увкунни Меликовлул.
Ванал бувсунни гьашинусса шинал 193 школа ремонт бувантIишиву, 17 азарва кIану бусса 38 школа бувантIишиву, 6.5 азарва кIану бусса 40 детсад бувантIишиву. Мукунма цIуллушиву дуруччаврил 4 объект, культуралул 2 объект ва спортрал 40 объект. Ва ялагу, 176 парк бакьин бувантIишиву, 18 ламу бувантIишиву ва 640 километралул манзилданийсса ххуллурду бакьин бувантIишиву. Меликовлул кIицI лавгунни цIанасса ппурттуву Дагъусттан инвестициярду кIункIу дуллалисса республика душиву, экономика гьаз дуваву мурадрайсса ххюра хъунисса проектру бартдигьинтIишиву. КIицI лавгунни ми проектирттавух уссал промышленностьгу душиву, бувсунни дагъусттаннал уссая ПМЭФ-рай кьатIаллил компаниярттугума цIухлай бивкIшиву. Гьануми проектирттавух цIарду рирщунни МахIачкъалаллал аэропорт цIубуккан баврил кIилчинмур ятIап, МахIачкъала, Дарбант, Хасавюрт шагьрурдал объезд дувансса «Кавказ» федерал ххуллу гьарта буваву, МахIачкъалаллал хьхьирил портрал даву хьхьичIуннай дуваву. Мукунма Дарбантуллал ва ЦIуссалакрал районнай хъус гьарзану машан ласайсса оптово-логистический центрду буван дакIний бушиву. – Нава ва къуллугърай авцIусса цалчинсса кьининия шихунай на хьхьичI ххуттайн лавсун ивкIра Дагъусттаннал агьалинал маэшат гьаз буваву мурадрайсса, ми марцIсса щинал дузал буваву мурадрайсса давуртту, ххуллурду буваву ва цIубуккан буваву, кIичIиртту, паркру, хIаятру лазилакьи дурну, дакьин дуваву, газрал ват ттукIрал щаллушин дуваву. Агьалинан чIалан аьркинссар ми ххуй чулиннайсса давурттал лифт щурун диркIшиву, цакуну 9-мур зивулийн гьаз дуван къашайссар му лифт, куннил хъирив кув ятIапрай, сантирай ва лябуккулий давуртту нани дурну хьхьичIунмай хъит тIун аьркинссару, – увкунни Меликовлул депутатътурахь. Бувсунни Дагъусттаннал агьалинал Донбассрал агьулданун 2200 тонна гуманитар кумаграл тIайла дурккушивугу, дагъусттаннал жагьилтал Украиннал аьрщарайсса спецоперациялуву чувшиврий талай бушивугу.
– Билаятран захIматсса ппурттуву гьармудангу Дагъусттаннал агьлу гьаз шайсса бивкIссар ватан дуруччин. Ва ххуллухгу жулва уссурвал чувшиврий бартбигьлай бур Аьрасатнал главнокомандующий Владимир Путиннул хьхьичIун лавсъсса аьралий масъалартту. Жува дакIнийхтуну хIайп тIий буру жан харж дурсса гьарцагу виричунал жандалий. Амма ттуршра метралул тийнмайну бивкIу ялугьлай бусса кIулнугу бунува, цIаравун ххявххуну нанисса жагьилтурал чувшиву – ми виртталсса ппухълуннал варистал бушиврул барашиннар», –увкунни Меликовлул. Гьаз бунни аьрщаралмур масъалагу, му къабигьасса бушиврий чIурчIав дурну. Ятту-гъаттара ябаврин ккаккан дурсса аьрщи цанма хайр ласун ишла дуллан къабучIиссар, микку школартту, амбулаторияртту бувну буссар, ми кIанттурдай яхъанахъисса ризкьичитурал мурадру буруччин аьркинссар, «О статусе земель отгонного животноводства» закондалийн бувну, аьрщарал статусгу цIакь дурну, кIанттул агьалинал ихтиярдугу Конституциялул тIийкун дурурччуну», – увкунни Меликовлул ва маслихIат бунни кIани-кIанттурдай агьалинан бувчIин буллан миннаща цучIав аьрщи зехлай акъашиву, аьрщи дагьайкун, низамрал кьаралданий зузи дуван багьлай бушиву. Конституциялул дахханашивурттал хIакъиравурив, Дагъусттаннал БакIчинал увкунни: – Агар на республикалул бакIчи хIисаврайгу, СКФО-лий къабигьасса ппурттуву аьралий опыт ккаккан бувсса генерал-полковник хIисаврайгу, дагъусттанчу хIисаврайгу ттулла республикалул дазурдал целостность къадуруччинтIишиврий щак-щуклийсса ухьурча, лавай ивзуну бусича цалва пикри. Дагъусттаннал депутатътурал «О поправках к Конституции Республики Дагестан» законопроект цалчин ххал дигьин чIурду буллунни, 82 депутатътураву проект ххал дигьин рязийну бушиврухлу 81 депутатнал чIурду буллунни.
