«Дагестан» РИА-лий хьунни ДР-лул цIуллу-сагъшиву дуруччаврил министр Татьяна Беляеващалсса ва республикалул хъунама санитар хIакин Николай Павловлущалсса пресс-конференция.

Муний ххал бивгьунни цIу­ллу-сагъшиву дуруччаврил хьхьичIунсса буруккинтту, ва коронавирусрал цIуцIаву хьхьара шаврийн бувну, маскардал режим дукьан даврийн багьай­сса суаллу.
«КIицI бан багьлай бур, 15 нюжмардул лахъишиврий жу сияхIрайн ласарду тасттикь хьу­сса коронавирусрал къашавайми азарханардай чан хьуну бушиву.
Ца хьхьу-кьини азарханалий уттуишин уллай уссия коронавирусрал къашавайсса 3-5 инсан. Махъсса кьини уттуишин арду 3 къашайшала. ХIакьинусса кьини Республикалул Инфекцион цIуцIавурттал центрданий бивхьуну буссар 25 къашайшалан­сса тах. Миксса биял хъанай бур. Амбулаториялийгу хъин хъанай уссар 33 инсан. Стационарданий уттуивхьусса 25 инсаннава 16 ур «COVID-19» тасттикь хьусса», – увкунни Беляевал.

Республикалий 23 къашайшала ур амбулаториялий вирусрал пневмония хъин дуллалисса.
«ЖучIара мудан сияхIрай дур пневмония. Дянивну гьарца нюжмардий ялун личлай ур 5-11 къашайшала», – увкунни министрнал.
Ххи бунни вакциналул агьамшиву хIакьинусса кьининийнгу дурану душиву духлаган. ХIакьину республикалий вакцина бан багьлай бур 1 млн. ва 200 азара инсаннайн. Республикалул цинявппагу медициналул идарарттай дузал дурну дур аьркинссаксса аьдад препаратирттал. Мукунма цинявппа республикалул, шагьрурдал ва районнал идарарттай бур коронавирусрал инфекция ялун личин дансса экспресс-тестру. «Тест ласун багьлай бур ттуршазара инсаннава ттуршлий ххюцIала хIисав увну. Мунийн бувну, гьарца кьини тест ласун багьлай бур кьинилун ххюазара инсанная, республикалийсса эпидемиологиялул тагьардания биялсса хавар бикIаншиврул», – увкунни Беляевал.
КIицI лавгунни ковид цIу­цIаву дурхIуминнансса реабилитациялул суаллугу.
Николай Павловлул бувсунни республикалий бушиву так вакцина «Спутник V». Ревакцинация бан бучIину бур «Спутникрал» цумур-бухьурчагу компонент ишла бувну, хьхьичIва цумур вакцина бувну бивкIхьурчагу.
«Спутник V» вакцина бувминнаща бюхълай бур ласун дазул кьатIув гьан ихтияр дуллалисса дунияллул халкьуннал сертификат. Республикалий хIадур хъанай бур хIажлийн гьан, хIажлийн наниминнан вакцина бан аьркинссар чара бакъа. Саоьдуллал Аьрабусттаннайн гьан ихтияр дуллалисса вакцинарттавун бухлай бур «Спутник V» вакцинагу», – ххи бунни Николай Павловлул.
Ванал бувсунни жула республикалий душиву инфекциялул къашайшивуртту ппив хьун бюхъайсса нигьачIаву. «Да­гъусттаннай ппив хьун бюхъай­ссар хъацIурдия дияйсса Конго-крымский геморрагическийсса лихорадка. Махъсса ххюва зуруй республикалий сияхIрайн лавсун бур мукунсса ишру.
Турагентстварттайн тIайла бувкссар муния хавар бусласи­сса чагъарду: хIадур бувну бу­ссар ми хъацIру ппив хъанахъи­сса кIанттурдай ишла бансса инструкцияртту. Ми кIанттурдайн нанийни чурххай дикIан аьркинссар бурчу кIучI буллалисса янна. Бурчу тIивтIусса кIанттурдайх дуккан аьркин­ссар хъацIру лихъан бансса репеллентру», – баян бунни хъунама санитар хIакиннал.
Крымская лихорадкалул профилактика дансса маслихIатру тIайла бувккун бур муниципалитетирттал каялувчитурайн, паркирдаву ва жямат батIайсса кIанттурдайн затру пурх учиншиврул.
КIицI лавгунни хъацIру ппив хьун къабитансса затру пурх куну душиву 26 гъинттулсса лагерь бусса кIанттурдал лагма-ялтту.
Каспий хьхьири чапалну бушиврул ялув санитар хIакиннал кIицI лавгунни тагьар Роспотребнадзорданул итталу душиву. Ххал дигьлай дур щинал чапалшиву. ДР-лул ХIукуматрал ххал дигьлай дур МахIачкъала шагьрулий канализация итадакьинсса кIанттурдал проект. Хьхьири марцI байсса сооруженияртту дуллай бур Дарбантлий ва Избербашрай.