АхIмадлул арс ХIусманов Халидлул ва зурул 2-нний кIицI ларгунни 85 шинал юбилей.
Юбилей цума-цанналгу оьрмулуву дурмунил кьимат бишлашисса, гихуннай дантIимуниягу пикрирду бувайсса чIун дур.
Ванал оьрмулул ва захIматрал ххуллурду ххал буллан бивкIукун, ца гьантта хьуну бакъар оьнма гьан бувсса, кIулшивурттал хъирив къаагьсса.
Увну ур Халид 1937-кусса шинал Ккуллал шяраву, хъинну бусравсса, ххюва оьрчI бусса кулпатраву. Ккуллал дянивмур даражалул школагу къуртал бувну, лавгун ур аьралуннаву къуллугъ буллан. Армиялия зана хьуну махъ, увххун ур Дагъусттаннал паччахIлугърал университетрал химиялул факультетрайн.
[dropcap]М[/dropcap]у факультетгу хьхьичIунсса хIасиллай къуртал бувну, цаппара хIаллай химиялул дарсру дихьлай ивкIун ур Хъусращиял ва Ккуллал дянивмур даражалул школарттай. Муния мукьах, Ростоврай аспирантурагу бувккуну, хьуну ур химиялул элмурдал кандидат. Зун увххун ур Дагъусттаннал педагогикалул институтравун. 1973-ку шиная айивхьуну, 30 шин дурну дур химиялул кафедралул каялувчину зий. Ванал кIунттива дурккун дур 100-нния лирчусса элмийсса давуртту ва методикалул луттирду. Ларсъссар ванал профессорнал цIагу.
ХIакьину Халид АхIмадович, пенсиялийн увккун, аьзизсса кулпатращал игьалаглай ур. Ванал тарбия бувну бур мусил медаллащал школа къуртал бувсса душ – хIакин, арс – юрист. Душнил къуртал бувну бур юридический аспирантура. Хъунна хъанай дур ва ххари уллалисса оьрчIал оьрчIал кьюкьа.
Гьашину дакI ххари хьунсса ца иш ттигу хьунни. МахIачкъалалив 11-мур классраву дуклакисса душнил душ Абуева Загьидатлул республикалул химиялул олимпиадалий шамилчинмур кIану бувгьунни.
Халидлул хIалал дурну дур «Почетный работник высшего профессионального образования РФ» ва «Заслуженный учитель РД» тIисса цIарду. Ва ур захIматрал ветеран. Дур диялсса ХIурматрал грамотартту ва Барчаллагьрал чагъарду.
Ххирасса Халид, вил хъуннасса юбилейгу барча дуллай, чIа тIий буру вин цIакьсса цIуллушиву. Вила тIиртIусса дакIнищал, аьчухсса ихтилатращал ина вила лагмами циняв рязи бувайсса кунма, инавагу ххари аннав хъунасса Заннал. Ххари аннав вила оьрчIал оьрчIал!
Июнь зурул 30-нний Химикнал кьинигу душиву дакIнийну, юбилейрал ялун барча тIий буру Халидлухь цала язи бувгьусса пишалул кьинигу!
Абакаровхъал, ХIусмановхъал кулпатру,
маччами, гъанми, дустал
