Май зурул 26-нний Расул ХIамзатовлул цIанийсса Национал библиотекалуву хьунни Дагъусттаннал паччахIлугърал политикалул ва жяматийсса ишккакку, аьлимчу, чичу, публицист ХIавинахъал Саэдлун 140 шин шаврин хас бувсса мажлис.
Мажлис бачин бувнугу ия МахIачкъала шагьрулул бакIчинал кумагчи Шалласу Шалласуев. Мажлисрал дайдихьу дуллалисса махъ лахълай, ванал бувсуна, цIанихсса революционер ва гьунар бусса шаэр, публицист, таржумачи, аьлимчу ушиврицIун, ХIавинахъал Саэд хъунисса къуллугъирттай зий ивкIсса каялувчигу ивкIшиву, Дагъусттаннал ревкомрал председательну, ДАССР-нул Просвещениялул наркомну, ДАССР-нул финансирттал наркомну зий ивкIшиву.
– ХIавинахъал Саэд Дагъусттаннал хъунасса арсри. Укун бюхттулсса арсурваврал аьпалул кьадру къабулларча, жулва наслулухь вайннал оьрмурдая къабусларча, жува духхин дуллалиссару, – увкунни Шалласуевлул.
Тарихрал элмурдал доктор, Тарихрал, археологиялул ва этнографиялул институтрал отделданул хъунмур Эльмира Далгатлул бувсуна ХIавинахъал Саэдлул тарихчи хIисаврай дурсса давурттая. КIицI лавгуна ва Дагъусттаннал тарих цалчинминнавух батIлай айивхьушиву, бугьараминнахь цIухлай, къакIулмур кIул буллай, хъинну хъирив лавну чивчушиву «Лаки, их прошлое и быт» тIисса монография. Дагъусттаннал паччахIлугърал университетрал тарихрал факультетрал кафедралул хъунмур Эльмира Зулпукьаровал кIицI лавгума Саэд Габиев Дагъусттаннал интеллигенциялул ца яла яргма вакил ивкIшиву. Тарихрал элмурдал кандидат, Тарихрал, археологиялул ва этнографиялул Дагъусттаннал федерал центрданий зузисса Муслимова Наидалмур доклад бия Саэд Габиевлуя публицист хIисаврай бусласисса. Лакрал райондалул Культуралул, жагьилтурал политикалул, спортрал ва туризмалул центрданул директор Ансар Къажлаевлул балжину бувсуна ХIавинахъал Саэдлул оьрмулул ххуллия. Филологиялул элмурдал кандидат, ДГУ-лул доцент Ххазина Аминовал бувсуна Саэд лакрал литературалул гьану бивзминнавасса ца ушиву, оьрус мазрай ва лакку мазрай пасихIну чичайсса гьунарданул заллу ивкIшиву, 1927-ку шинал «Лакку чугурданул чIу» тIисса ванал шеърирдал лу итабавкьушиву, мукунма Михаил Лермонтовлул назмурду ва Крыловлул баснярду лакку мазрайн таржума бувшиву. Дагъусттаннал халкьуннал шаэр Космина Исрапиловал бувсуна Габиевлул дагъусттаннал литературалуву цIа личIансса произведенияртту чивчушиву, дурккуна ванал назмугу. Философиялул элмурдал доктор, ДГИ-лул кафедралул хъунмур Асият Буттаевал аьлтту бувна 1915-ку шинал Петроградрай Саэдлул итабавкьуну бивкIшиву «Аьраб, ислам ва аьраб-бусурманнал культура» тIисса тарихийсса очерк ва му очеркраву исламрал хъамитайпа гьаз буллай бушиврий чIурчIавгу дуллай ушиву. Дагъусттаннал технический университетрал кафедралул хъунмур, профессор, чичу Нажават Абуевал бувккуна АьбдурахIман Данияловлул дакIнийн бичавурттавасса, ХIавинахъал Саэд репрессиялул щатIухьхьун иривсса ппурттуву ванащалсса хьунаакьаврия бусласисса парча. ХIавинахъал Саэд гьарца чулухагу итххявхсса дурккучу, просветитель, аьлимчу ивкIшиву мяъна-мурадрайсса ихтилат бувна «Дагестан» журналданул хъунама редактор Марат ХIажиевлул.
МахIачкъалаллал № 1 ва № 16 школардал дуклаки оьрчIал дурккуна ХIавинахъал Саэдлул лакку мазрайсса назмурду. Библиотекалул зузалтрал хIадур дурну дия ХIавинахъал Саэдлул оьрмулул ххуллия бусласисса стендругу.
Мажлисрай ихтилат буллалими, ца зумату кунма, кIицI лаглай бия ванал юбилей, чIявусса агьалигу бавтIун, лайкьсса даражалий кIицI дуван аьркиншиву. Библиотекалуву хьумур даву ххуйсса даражалий дувансса бюхъу-хIарачат буваврихлу барчаллагь тIий бия Муслимат Абакаровайн, Национал библиотекалул культуралул программардал отделданул хъунмунийн.
