ЦIусса луттирал презентация

ЦIусса луттирал презентация

Май зурул 27-нний МахIачкъалалив, Поэзиялул театрдануву, хьунни уттигъанну дунияллия лавгсса Дагъусттаннал халкьуннал шаэр Сибирбаг Кьасумов дакIнийн утлатисса ва ванал цIусса «Ттул оьрмулул даптар» тIисса луттирал презентация хIисаврайсса литературалул мажлис. Жуж сакин бувну бур авторнал уттинин чивчусса произведениярттава язи бувгьуминнуя. Итабавкьуну бур Сибирбаглун 75 шин шаврил савлугъран.

Ххаллилсса дуснал, цIанихсса шяравучунал Жабир Абакаровлул спонсоршиву дурну дунияллийн бувксса ва лу канил бугьан авторнан цанма нясив хьуну бакъар.
Мажлисрал дайдихьу дуллалисса ихтилатраву Дагъусттаннал Чичултрал союзрал председатель МахIаммад АхIмадовлул кIицI лавгуна Сибирбаг Кьасумовлул биялсса бутIа бивхьушиву дагъусттаннал литература ларайгу, дюхъангу дувавриву, шаэр, таржумачи, драматург хIисаврай яргсса цIа тарихраву ва литературалул ирс-ххазиналуву личIансса произведениярттал автор ушиву. Бувсуна ва ттуршва­хъул машгьурсса балайрдал автор ушиву ва дагъусттаннал литературалуву шеърирдайсса цалчин­сса « Исакь-лелуххи» кьи­ссалул автор ушивугу. Гихунмайгу мажлис бачин бувну ия цува МахIаммад АхIмадов.

Да­гъусттаннал халкьуннал артист Аслан МахIаммадовлул чIурчIав дурна Кьасумовлул лакрал миллатрал тарихрал лахIзарду аьч буллалисса пьесарду чивчушиврий ва Лакрал театрданул ми пьесарду лахъсса даражалий ккаккан бувшиврий.

Махъру лавхъуна Х1укуматрал ЦIуссалакрал агьлу ЦIуминалийн бизан баврилсса буллалисса комитетрал управлениялул каялувчи ХIажи Султановлул, профессор Шагьимардан Мудуевлул, философиялул элмурдал доктор Асият Буттаевал, Поэзиялул театрданул директорнал хъиривчу Супиян Оьма­ровлул, жяматий­сса ишккакку ва меценат Жабир Абакаровлул, «Дагестан» ГТРК-лул лакрал радиолул редакциялул хъунмур редактор Тамара Закарьяевал, Дагъусттаннал Луттирду итабакьай издательствалул лакрал редакциялул редактор Хизри Илиясовлул, чичу, критик, публицист Алексей ХIажиевлул, МахIачкъалаллал Лакку мазрал учительтурал ккурандалул хъунмур ПатIимат Аьлиевал. Дагъус­ттаннал халкьуннал шаэр Космина Исрапиловал бувккуна шаэр дунияллия лавгсса кьини цилва оьрус мазрай чивчусса Сибирбаглухасса шеъри. Сибирбаг Кьасумовлул му­къурттийсса балайрду увкуна Да­гъусттаннал халкьуннал балайчи Лариса ХIажиевал ва ХIажиаьли ХIажиаьлиевлул, Дагъусттаннал лайкь хьусса балайчитал Загьидат Муслимовал, Карин Кьадинаевлул ва Арслан Шагьмардановлул, Дагъус­ттаннал культуралул лайкь хьусса зузала Тамара Закарьяевал. Ахирданий шаэрнал душнил, Нину Кьасумовал, барчаллагь увкуна мероприятие сакин дурминнахь, ппу къашавайсса чIумал чIарав бавцIуцириннахь ва ванал гьунарданул кьимат кIулцириннахь.

Къалявхъуссаниягу Дунъяллийн лаккучуну, УчIантIиссия вичIан Оьрмулул лихъачуну.
«Буттал улклухь» тIисса ва шеърилуву бур Сибирбаг Кьасумовлул щаллагу творчествалул туннулул тарг.

Аватар

Патимат Рамазанова

Заслуженный работник культуры РД

Читайте также: