Майрал 28-нний Каспийскалий – Каспийскаллал флотилиялул штаб-шагьрулул хъун майданнив, хьунни «Zа ВМФ!» цIанилусса патриот зумунусса турданул лагрулийсса концерт.
Ва журалул концертру хьуссар Аьрасатнал цинявппагу флотирттай – шанма хьхьири ва кIива океан – Президентнал Культуралул сиптардал Фондрал кабакьаврийну. Каспийскалиймур шадлугъ хьунни ДР-лул БакIчи Сергей Меликовлул кабакьаврийну.
Концертрайн бавтIсса чIявусса тамашачитурал хьхьичIун сахIналийн бувккуна Аьрасатнал лайкь хьусса артист, АьФ-лул ПаччахIлугърал Думалул депутат Денис Майданов, Аьрасатнал лайкь хьусса артистка Ольга Кормухина, Донецкаллал театрданул вокалистал Наталья Качура ва Кристина Древаль, SТ, группа «ПослеZавтра», Аьрасатнал лайкь хьусса артист Сергей Войтенко ва «Баян-микс» группа, Каспийскаллал флотилиялул Аьрали оркестр, Дагъусттан Республикалийсса ФСБ-лул Пограничный управлениялул балайлул ва къавтIаврил ансамбль, Росгвардиялул МахIачкъалаллал соединениялул Аьрали оркестр.
Жулла республикалул чулуха тIурча, концерт чIюлу дурна Т. Мурадовлул цIанийсса Дагъусттаннал паччахIлугърал филармониялул артистътурал, къавтIаврил ва балайлул «Дагъусттан» ансамбльданул, Дагъусттаннал опералул ва балетрал театрданул хорданул, Дагъусттаннал Б. Мурадовал цIанийсса Культуралул ва искусствалул колледжрал студентътурал ва творчествалул цаймигу коллективирттал.
Шадлугърай гьуртту хьуна Дагъусттаннал БакIчи Сергей Меликовгу. Цалва ихтилатраву ванал барчаллагь увкуна Денис Майдановлухь ва республикалийн бувкIсса, ва хьхьуну сахIналийн бувксса цинявннахьвагу, кIицI лавгуна ва кьини сахIналул цачIун бувшиву личIи-личIисса оьрмурдал цикссагу инсантал ва вай цинявппагу бувкIшиву шиккун ца сававрай – цал ттигу тасттикь буван цинявннанмагу аьмсса девиз – «Мы вместе!».
ЧIа увкуна тIайлабацIу хьхьирил бахьттагьалтран, гвардейский 126-мур бригадалун, Национал гвардиялул аьралуннал 102-мур бригадалун ва билаятрал тархъаншиврухлусса махъсса цинявннанмагу. Донбассрая бувкIсса артистътурал чулухунай урувгун, увкуна:
– Жу зущал 2014-ку шиная шийнмай буссару ЛНР-лий ва ДНР-лий хъанахъимунил ялув буруккинттарай. Муния шихунмай Дагъусттаннал кьамул буллай буссар цалла мина-гьану кьаритан багьми. Барчаллагьрал махъру учин ччива Донецкаллал ва Луганскаллал аьрщарай аьрали задачартту щаллу буллалиминнахь, мукунма цIанасса чIумал захIматсса тагьарунниву ливчIминнахь. ЗахIматшивуртту чIумуйнуссар. Жу зущал буссару.
Вара мяъналийсса ихтилат бувна Каспийский флотилиялул Краснознаменный штабрал начальник, контр-адмирал Николай Якубовскийлгу.
«Zа ВМФ!» цIанилусса концертрал тур хьуссар майрал 13-нния июньдалул 1-ннин Аьрасатнал ххюва шагьрулий: Севастополлай, Калининградрай, Владивостокрай, Каспийскалий ва Североморскалий.
