Нюжмар кьини, майрал 27-нний, ЦIуминалийсса ЦIуссалакрал шяраву, Агьалинаха къайгъурдайсса центрданий (КЦСОН), хьунни ОьрчIру буруччаврил кьинилун хас дурсса байран. ОьрчIал байран КЦСОН-далул зузалтрал мудангу лахъа- хъунну кIицI лагай. Ва кьинигу Центрданул хIаятравун бавтIун бия чIюлуну лархсса мюрщи оьрчIру ва нину-ппу. ХIаят чIюлу дурну дия байрандалун хасну. Ккаккиялун дирхьуну дия ва кьининин райондалул школардай баян бувну бивкIсса конкурсрайн оьрчIал дирхьусса суратру. ЛичIину лархъун дия хьхьичIунсса кIанттурду бувгьуми суратру.
Мажлис тIитIлай, оьрчIругу, нину-ппугу барча бунни Центрданул хъунмур Малика Джамхатовал ва хъиривчу Аьбидат Аьбдуллаевал. ОьрчIал бувккунни шеърирду, увкунни балайрду, ккаккан дунни къавтIавуртту. ЧIава акробаткахъалгу ккаккан бунни цала гьунарду. Цинявппагу оьрчIан дунни дакIний личIансса бахшишру. Ми дакъассагу, ва кьини байрандалийн бувкIсса хъунанайхгу, мюрщинайхгу бавчIунни нацIу-кьацIулул кьуцуртту.
ОьрчIангу, нитти-буттангу хас бувну ххаллилсса балайрду увкунни райондалул Культуралул управлениялул артистътурал. ОьрчIащал личIи-личIисса тIуркIурду буллай, ссигъри бувчIлай, хъиннува тяхъа буккан бунни шадлугърал мажлис аниматортуралгу.
Малика Джамхатовал, Аьбидат Аьбдуллаевал ва оьрчIал нитти-буттал дакIнийхтунусса барчаллагь увкунни гьарца шинах оьрчIал байран дан кабакьу буллалисса спонсортурахь.
Андриана Аьбдуллаева,
Имара САИДОВА
