Гъумук, чIявусса агьалигу бавтIун, кIицI ларгунни ОьрчIру буруччаврил кьини. ОьрчIру барча буллай, райондалул бакIчи Юсуп МахIаммадовлул увкунни:
– Ва кьинилул жун, хъуниминнан, цал ттигу дакIнийн бутай цуксса аьркинну дуссарив хъун хъанахъисса никирах муданнасса аякьа, оьрчIал ихтиярдал хIурмат бикIан аьркиншиву, миннал ялун бучIантIимунихсса жула жаваблувшиву.
ОьрчIру – жула аваданшивур. Миннал цIанийру жува зузиссагу, заназиссагу. ОьрчIан яла аьркинсса цIуллушиву ва бавкьусса кулпатри. ОьрчIан ххарисса ва талихIсса оьрчIшиву пишкаш даву – му кулпатрал, жяматрал ва паччахIлугърал буржри. ОьрчIал кIунттихьхьун жува буллалиссару жула ялун бучIантIимур ва вайннал кумаграйхчинни жущара инсаншиву дусса, тIайласса ва иш бавчусса общество хIасул дан. Жува буржлувссару жула оьрчIал яла агьаммур ихтияр – талихIсса оьрчIшиву дуруччин ва дузал дан. Юсуп МахIаммадовлул мукунма кIицI лавгунни магьирлугърал школалул материал-технический гьану цIакь баврийну мунил коллективрал хьхьичIунсса кIанттурду бугьлай бушиву республикалул конкурсирттай ва фестиваллай, хьхьичIунсса ккаккияртту хъанай душиву ОьрчIал ва чIаважагьилтурал спортшколалийгу.
– Райондалий оьрчIал дянив спортрал бяст-ччаллу буллалисса аьдат цIакь шаврийну, шикку вардиш хъанахъими хьхьичIунсса кIанттурду бугьлай бур республикалий. Ва хъунмасса тIайлабацIур, жула пахрулун лайкьсса, – увкунни райондалул бакIчинал.
КIицI лавгунни гихуннайгу администрациялул хъуннасса къулагъас дуллантIий бушиву оьрчIру магьирлугъраву ва спортраву итххяххан баврих.
ОьрчIал магьирлугърал школалий тарбия хъанахъиминнал хъуними ххари бувна цала гьунардайну. Байрандалул дялахърурду чIюлу дуруна Гъумучиял кIивагу детсадравун заназисса оьрчIалгу. КIулшиву дулаврил управлениялул каялувчи Темирлан ХIажиевлул ХIурматрал грамотартту ва бахшишру дуллуна асфальтрай суратру дишаврил конкурсрай хьхьичIунсса кIанттурду бувгьусса оьрчIан.
