Дагъусттаннал БакIчи Сергей Меликовлул республика гьаз дувавриву биялсса бутIа бивхьу­сса цIанихсса инсантурал цIарду абад дуллалисса указрай къулбас дунни. Республикалул Перинатал центрданун дирзунни машгьурсса акушер-гинекологнал, РАМН ва РАН-далул член, Да­гъусттаннал медициналул корифей Султан-Мурад Оьмаровлул цIа. Ванал цIаницIун цIакьну бавхIуну бур Дагъусттаннай медицина лахъсса даражалийн гьаз шаврил тарих. Ванал цIа бусравну дур, Дагъусттаннай дакъагу, республикалул кьатIувгу. Ванал цIа дургьуну республикалийн чIявусса инсантал занай бивкIун бур цайми регионнаягу.