Майрал 30-нний Дагъусттаннал БакIчи Сергей Меликовлул дунни Республикалул Антитеррорданул комиссиялул ва Оператив штабрал цачIусса батIаву.
Региондалул каялувчинал тIимунийну, Украиннай хасъсса дяъвилул операция буллалиссаксса, санкцияртту лахъи лаглагиссаксса, бюхъайссар щала билаятрайгу, жулла республикалийгу терроризмалуцIунсса ва экстремизмалуцIунсса нигьачIаврил тагьар ялунгу гужлан хьун. Мунийн бувну, республикалул каялувчинал увкунни, Аьрасатнал Федерациялий терроризмалул идеологиялийн къаршисса Комплексъсса план аьркинну дур, цила чIумал ишла дуван чIумул тагьарданух бурувгун. Дагъусттаннал идарарттангу мукунна, цалла давурттугу, масъаларттугу хIисавравун лавсун, аьркинну бур му документраву дуван тIайлабацIан бавуртту.
БатIаврий гьуртту хьуминнал ххал бивгьунни Комплексъсса план бартдигьаврил, транспортрал системалул ва цаймигу объектирдал мюхчаншиву дуруччаврийн багьайсса масъалартту.