ОьрчIру буруччаврил кьини МахIачкъалаллал мэр Салман Дадаевлул чIявусса оьрчIру бусса Шагьбулатовхъал кулпатран пишкаш бунни микроавтобус «Газель».
Хъаннил байрандалул кьини оьрчIал нину Мадинат Шагьбулатова барча буван вайнначIан ичIунай лавгсса мэрнан асар хьуну бур ванил бусласимур. Бувцусса 8 оьрчI хъуни буллалисса кулпатран кIива такси бучIан буван багьайсса бур чун-бунугу нанийни.
Масалдаран, Гергебильский райондалийн (ва бур ванил буттал улча) аьлтту буккан нанийни так ца чулийнмайсса ххуллух ххюазарда къуруш дулун багьайсса бур. Ванил миннат бувну бур мэрнахь транспортрал кумаг бувансса иш бувакьай куну. Салман Дадаевлулгу, микроавтобус буллуну, кулпат ххари бунни. ДакIнийн бутанну, Мадинатлул хъунама арс Рамазан спецоперациялуву щаву дирну, захIматну ивкIшиву.
Ванил хъа бувну бур, агар арс хъин хьурча, ятинсса оьрчIру хъуни буванна куну. Рамазан, хъин хъанан икIайхту, Мадинатлул Астраханнайсса детдомрая шанма оьрчI бувцуну бур, яла ми оьрчIал гьалмахталгу. Мяйлчинма оьрчIан Башир цIа дур. Шагьбулатовхъал циняв оьрчIан дагъусттан цIарду дуллуну дур, оьрчIан цинявннан яру маз кIулну бур. ОьрчIал ниттийн яру мазрай ттюнгъану «баба» учайсса бур.
