Щалагу Аьрасатнал «Библионочь» акциялувух гьуртту хьунни Дагъусттангу. Акциялул лагрулийсса шадлугъру хьунни Р. ХIамзатовлул цIанийсса Национал библиотекалий. Шиккува кIицI лаган, ва акция гьашину 11-нни хъанахъисса.

Гьашинумур акция хас бувну бия жулва билаятрай баян бувсса Аьрасатнал халкьуннал культуралул ирсирал шинан.
«Библионочь – 2022» акциялийн Национал библиотекалул зузалтрал хIадур дурну дия гьарта-гьарзасса программа. Ванийн бувну ва хьхьуну хьуна луттирдал выставкарду, личIи-личIисса инсантуращалсса хьунабакьавуртту, халкьуннал сянатирттал мастер-классру, кинопоказру.

Ссуссукьусса каширду дусса оьрчIал «Полет мечты» цIанилусса клубрал каялувчи Элла ХIасановал дурна пластилинографиялул «Къайтагъуллал накьичру» тIисса мастер-класс.
Дагъусттаннал магьри гьанулун лавсун Культуралул программарттал отделданул хIадур дурну дия «Ххуржинттавасса мультфильмру» тIисса мультпоказ. Мукунна акциялул яла мюрщими гьурттучитурансса Дагъусттаннал аьдатирттал викторинагу.

Музыкалулмур бутIуву «Лезгинка» ансамбльданул хореографиялул школа-студиялул щаллу дурна миллатирттал къавтIавуртту.
Гихунмай акциялул гьурттучитал бивуна «миллатирттал тIювардайн», ххал дурна ичIура ишла дуваймур, дукрарду ва самоварданувасса чяй.
Библиотекалул нажагь бакъа къабикIайсса луттирдал отделданул хIадур дурну дия «Сокровищница книжных редкостей» цIанилусса выставка.
Шяраваллил хозяйствалул ва техникалул литературалул отделданул хIадур бувну бия «Бархъаллал тIахIни», «Табасараннал бартбису», «Къайтагъуллал накьич» ва цаймигу цIардалусса мастер-классру.

Библиотекалул конференц-залдануву хьуна «Дагъусттан» тIисса художественно-публицистический журналданул цIусса лагрулул презентация. Журналданул хъунама редактор Марат ХIажиевлул бувсуна журналданий хьусса дахханашивурттая.
Акция щаллу хьуна цIа дурксса балайчитурал ккаккан дурсса концертрал программалийну.