Уттигъанну хьусса Дунияллул халкьуннал дянивсса динийсса форумрал хIасиллу дуван «Дагестан» РИА-лий шаннагу диндалул вакилтал хьунабавкьунни республикалул журналистътуращал.
Дагъусттаннал национал политикалул ва диндалул иширттал министрнал хъиривчу Мурад Шяпиевлул бувсунни форумрай гьурттушинна дуршиву 150 инсаннал, миннавух кьатIаллил билаятирттаясса ва цайми регионнаясса хъамалгу бивкIшиву.
– Экспертътурал лекциярду бакъассагу, культуралул ва спортрал программагу дуссия форумрай: волейболданий, футболданий буккаву, шахматирттал турнир ва цаймигу тIуркIурду. Ттун ттунма хасну ххуй бивзунни динчитал ва студентътал архIал ттуплий буклакисса лахIзарду. Регионная бувкIсса экспертътал, махъатунин студентътуращал щябивкIун, цанма кIулмур студентътурахь буслай бия. Ва форумрая цинявннан хайр-мюнпат буссар, – увкунни Дагъусттаннал гуманитар институтрал ректор НухIкьади БахIмудкьадиевлул.
Ванал бувсунни гьуртту хъанахъими Дарбант шагьрулийнгу бившиву. МахIачкъалаллал епархиялул секретарь иеромонах Силуаннул бувсунни ва форумрал ккаккан буллалишиву республикалий шаннагу диндалул вакилталгу, агьлугу бавкьуну, нахIуну къуццу тIий бушиву.
Ягьудинал диндалул вакил Борис Ханукаевлулгу кIицI лавгунни гьар шинах ягьудинал жагьилтурал чялишсса гьурттушинна дувайшиву форумрал давриву, яла цалла форумрая ларсъсса кIулшивуртту кIани-кIанттурдайгу жагьилтурахь буслай, миннангу лахьхьин буллай бикIайшиву. Шаннагу диндалул вакилтал гьурттусса ва пресс-конференциялий бувсунни, ялунчIинсса форум ацIилчинсса хъанай бухьувкун, юбилейрал форум лахъа-хъунну кIицI лаган дакIний бушиву.
