Ттучандалул арцу дарцуну дур
МахIачкъалаллал Советский райондалул полициялул отделданул зузалтрал кIул бувну бур дикI даххайсса ттучандалий администраторнал хъиривчуну зузисса 24 шинавусса душнил хьусса къажанжулия 924 130 къуруш дарцушиву. Ва мукIру хьуну бур. Ва иширал хIакъираву уголов дело сукку дурну дур. Силистталул даву уттигу найнна дур.
ЧIила щуну дур
Къумтуркъалаллал райондалул азарханалийн Анаварсса кумаграл бригадалул иян увну ур лякьлуйн чIила щусса адамина. Ва иш хьуну бур Къараман — 2 микрорайондалий. ЦачIу хIачIлай бивкIсса дустурал дянив къалмакъал хьуну, цаннал (49 ш.) цаннайн (59 ш.) чIила щуну дур. Ва иширал хъиривлаявуртту дуллай бур.
ОьрмулуцIа хьуну ур
Лаващиял райондалий, «Леваши-Чугли» ххуллул 2 км. риртсса кIанттурдай, «ВАЗ-210540» машина, 30 шинавусса адаминаща байгьин къавхьуну, кьакьалувун багьну бур. Адамина, цIунцIияртту хьуну, азарханалийн иян увну ур. Шикку, кIулшилийн къаувкIун, къуртал хьуну ур. Ва иширал хIакъираву материал дартIун дур.
ХIарамзаданал хъяврин бувну бур
Хъиривлаявуртту дуллалисса Къизлардал полициялул зузалтрал кIул бувну бур 2019- ку шинал МахIачкъалалиясса 31 шинавусса адаминал, Къизлардаясса 63 шинавусса хъамитайпа хъяврин бувну, мунища 250 азарда къуруш ларсшиву. Щак багьлагьисса адамина полициялул отделданийн увцуну ур. Ва хьхьичIвагу танмихIрайн кIункIу увну ивкIсса ур. ЦIухху-бусу буллалийни ванал бувсун бур, хъамитайпа, цайнна вихшала дишин бувну, субсидиярттал ва пенсиярттал документру банна тIий, хъяврин бувну арцу ларсъшиву.
Ва иширал хIакъираву материал дартIун дур.
