Ялу-ялун арх хъанай дур Хъун дяъви байбивхьусса 1941-ку шинал июньдалул 22-мур кьини, шиная шинайн чан хъанай бур дяъвилул ва захIматрал ветеранталгу. Ххувшаву гъан дуллай талатаврил майданнай ва къинттуллух зий бивкIми чIявуми жула дянив бакъар, бакъанугу, вайннал аьпа мудангу сагъну бикIантIиссар гъан-маччаминнал, кIулминнал дакIурдиву, дакIнийн бичавурттаву.
Ванияр шиннардил хьхьичI аьпалул хьусса ЧIяйннал шяравасса дяъвилул ва захIматрал ветерантал Рамазан ва ПатIима Шалласуевхъал авладрангу вай мудан дакIний бур, вайннал бувсса захIматрал бусрав хъирив нанисса никирал агьлу кьадрулий ябуллай бур.
Гъуртихъал Шалласул арс Рамазан ва Щайхлул душ ПатIима цаннан ца ккавккун бур 1945-ку шинал. Вара шинал ташулул хьуну, вайннал нахIуну, бавкьуну ялапар хъанай сайки 60 шин хьуну дур.
Увну ур Рамазан 1915-ку шинал ЧIяйннал шяраву хъудугьул кулпатраву. Га чIумул оьрчIал кунма, Рамазаннулмур захIматрал ххуллугу ччяни байбивхьуну бур. Оьрмулул 14 шинаву жяматрал дучри канаки буллай ивкIун ур. Буттал шяраву 7 классгу къуртал бувну, увххун ур Дагъусттаннал автоххуллурдал техникумравун. Амма, лапра захIматсса ккашикарсса чIунну сававну, зун багьлай, дуккаву кьаритан багьну бур. Цаппарасса хIаллай Рамазан зий ивкIун ур райондалий сберкассалий. Махъ МахIачкъалалив увххун ур бухгалтертал хIадур бувайсса курсирдайн. Ми къуртал бувну махъ тIайла увккун ур Къурагьиял (Курахский) райондалий налоговый бухгалтерну зун. Махъ Рамазан зий ивкIун ур Туркманнавугу, Мары шагьрулий областьрал конторалий Госбанкрал контролерну, вава къуллугърай КIапIкIайливгу (Назрань). Ватандалийн кьини дурксса чIумал оьрмулул 26 шинавусса Рамазан К1ап1к1айлиява хушрай аьрайн лавгун ур.
Чурххал лахъсса, гуж бусса Рамазан най уна каялувшиндарал итталун агьну ур, ва ивтун ур связьрал отделениялул командирну. Талай ивкIун ур Совет Союзрал Виричу Карелиннул каялувшиндаралусса гвардейский полкраву. Гьуртту хьуну ур Воронежский, Степной, Донской ва цаймигу фронтирттайсса личIи-личIисса талатавурттавух. Прохоровкалий захIматсса щаву дирну, киямур каницIа хьуну ур. Дяъвилий ккаккан дурсса къучагъшиврухлу Рамазан лайкь хьуну ур «ЯтIул ЦIукул» кIира, Буттал кIанттул дяъвилул кIира ордендалун ва чIярусса медаллан. ПатIималгу диркIун дур паччахIлугърал чулухасса награда, 1944-ку шинал дуллусса, «За оборону Кавказа» медаль.
Аьрая зана хьуну махъ кьинирдал ца кьини цала дуснащал базаллувух нанисса Рамазаннул итталун дагьну дур душваврал ккуран. Мунивугу ляличIину чIалачIисса ПатIимай ябавцIуну бур. Ва бивкIун бур базаллуву дахлахисса мусил вичIилусру лахлай, ххал дуллай. Най унава душних эшкьи хьусса жагьилнан хъинну ччай бивкIун бур га ппурттуву гай вичIилусру, машан ларсун, най дунура душнин пиш-каш дуван. Амма дахьа дяъвилия увкIсса жагьилнахь му чIумал мусих дулунсса арцу къадиркIун дур. Рамазаннул шавай зана хьусса 1945-ку шиналва бувцуну бур ПатIима.
Рамазаннул ва ПатIимал дянив хьуну бур мяйва оьрчI. Инсаншиву дусса, тIайлашиву ва захIмат ххирасса лас-щарнил цалва оьрчIругу укунма тарбия бувну бур. Рамазан зий ивкIссар Ккуллал Райкомпартиялул аьралий отделданул хъунаману, ЧIяйннал шяраваллил советрал председательну, райсобесрай, сбербанкрай хъунама бухгалтерну. Аьпалул хьуну ур Рамазан 2004-ку шинал, оьрмулул 90 шинаву. Ва ивкIуну хъунма хIал къавхьуну, оьрмулул 85 шинаву ПатIимагу аьпалул хьуну бур.
– Жул ппу икIайва хъинну тIайлашиву ххирасса. Жугу тарбия бувссару тIайламур ххирану, хъунанал хIурмат буну, ас-намус хьхьичIунну. Буттал авторитет, хIурмат лавайсса бия, дуллалимунивугу, бусласимунивугу, пикрирдавугу, янна-ка лаххавривугу, гьарца занакьулушиндаравугу марцIшиву ххирасса ия, – буслай бур Каспийскаллал ЦБС-лул 2-мур филиалданул хьхьичIунмур библиотекарьну зузисса Хадижат.
Га чIумал шяраваллаву, райондалий Хъаннил совет бивкIун бур, къатравух буклай, марцI-чапалшиву ххал дуллалисса. Ва ишираву хьхьичIунминнан ЯтIул ттугъгума булайсса бивкIссар. Кулпатраву мяйва оьрчI бусса (пIяй-пIяйтIи бувну вайгу лаххан бувну) къуш хьхьичIунну бачин бувсса ПатIимангу цимилгу буллуну бур му ттугъ.
Хъуни хьуну, школагу къуртал бувну, кувннал ларайсса, кувннал дянивсса пишакаршиврул кIулшивуртту ларсун, оьрчIру цалва-цалва оьрмулул ххуллурду бувгьуну, кулпатирттал хьуну бур. Ххувшаврил байрандалул кьини бикIу, цайми-цайми иширттай бикIу вай, цивппа чув бунугу, батIайсса бивкIун бур нитти-буттачIа. Мукунма, циняв лагма лавгун, кIицI лавгун бивкIун бур Рамазаннул ва ПатIимал «мусил хъатIул» таварихгу.
Рамазаннул ва ПатIимал оьрчIая кIия аьпалул хьуну ур. Вайми оьрчIру-душру, вайннал агьлу-авлад Дагъусттаннай, Аьрасатнал личIи-личIисса шагьрурдай ялапар хъанай бур. Цивппа чув бунугу, ссаха зий бунугу, вайннан тачIавгу хъамакъабитай цалва нитти-буттал бувтсса хъунмасса захIматрал ххуллу.
